بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ ماں چاگردی رسانکدر ایکس ءَ کراچی ءَ بی وائی سی ءِ زھرشانی ءِ سر ءَ سند پولیس ءِ ارش کنگ ءُزھرشانی کنوکانی دزگیریءِ پژدر ءَ نبشتگ کہ پاکستان ءَ بلوچانی ایمن ءُ راجمستری زھرشانی میار باری یے لیک اتگ ءُ درسیں سیمسر گواز کرتگ اَنت۔ مرچی کراچی ءَ پہ زیشان زھیر ءِ ناھکیں کوش ءِ بگیری ءَ پرایمنیں زھرشانی ءِ میان ءَ آمنہ بلوچ ءَ ھوار دگہ باز مردم دزگیر کنگ بیتگ۔
آئی ءَ گوشتگ کہ زیشان پیسر ءَ زوراکیانی آماچ بیتگ کہ آئی پت بیگواہ اِنت ءُ پاکستان ءِ چیریں آزار جاھاں بندیگ اِنت، آ انساپ ءِ لوٹگ ءَ بیتگ کہ پنجگور ءَ پاکستان ءِ کمکاراں نشانگ کرتگ ءُ کشتگ۔ آئی مستریں میارباری انساپ ءِ لوٹگ اِنت۔
ڈاکٹر نسیم بلوچ ءَ گوشتگ کہ آمنہ بلوچ ءِ وڑیں پرایمنیں زھرشانی کنوکانی دزگیری پاکستان ریاست ءِ راستیں چھرگ ءَ پیش دار ایت۔ ھما چھرگ کہ آ زوراکی کنت ءُ چہ بلوچانی توار ءَ ترس آماچ اِنت۔
بی این ایم ءِ سرکماشءَ گوشتگ دانکہ بلوچستان پاکستان ءِ زورگپت اِنت بلوچان ءَ انساپ دیگ نہ بیت ءُ کمشرپ کنگ بنت۔ چہ پاکستان ءَ آجوئی جیڑھاں گیش ءُ گیوار کنت۔
