بلوچ نیشنل موومنٹ ( بی این ایم ) ءِ سرکماش ڈاکٹر نسیم بلوچ ءَ گوشتگ ادیل بلوچستان ءِ ھند تربت ءِ جاہ منند یں ماسٹر اکبال ءِ زھگ اِنت۔ یکبرے پاکستانی پوج ءِ دست ءَ آوار جنگ ءُ بیگواہ کنگ بیتگ اَت۔ ھزارانی کچ ءَ کھولانی وڑ ءَ ماسٹر اکبال پہ وتی زھگ ءِ آجوئی ءَ زھرشانی کرتگ ءُ آمیدگس ءَ شتگ۔
آئی ءَ گوشتگ کہ سالے ءِ زوریں بیگواھی ءَجانی ءُ سسائی آزار دیگ ءَ پد ادیل یل کنگ بیتگ۔ بلے ادیل ءَ آئی جند ءِ پتءُ پیروکی ھند ءَ پاکستانی چیریں ادارھاں کشتگ۔
ڈاکٹر نسیم بلوچ ءَ گوشتگ کہ اے تھنا یک گسے نہ بلکیں پہ سرجمیں بلوچ راج ءَ ویلے۔ یکبرے پد ءَ ھمے پیش دارگ بیتگ کہ پاکستان ءَ بلوچ چہ آوارجنی ءُ آزاراں سلامت بہ بیت پد ءَ ھم پھریز نہ اِنت، ریاست آئی رندگیری ءَکنت۔
آئی ءَ گوشتگ کہ جست ھمیش اِنت بلوچ کج ءَ برو اَنت۔ چہ اے دردناکیں بلوچ چکچینی ءَ پھریز بوگ ءِ راہ کجام اِنت۔
ڈاکٹر نسیم بلوچ ءَ گوشتگ کہ راستی ھمیش اِنت چہ پاکستان ءِ زورگپتی ءَ نہ انساپ رس ایت ءُ نہ باندات پھریز اِنت۔ پمشکا بلوچ راج ءَ آجوئی ءِ راہ گچین کرتگ ءُ ھمے مئے زندگ بوگ ءِ مانزمان اِنت۔
آئی ءَ گوشتگ کہ پاکستان مارا ھلاس کنگ لوٹ ایت، بلے مارا پہ وتی پجار، پہ وتی سرڈگار ءُ وتی مردمانی پھریزگ ءَ گھگیری کنگ لوٹ ایت۔
ڈاکٹر نسیم بلوچ ءَ گوشتگ کہ ما داں ھما وھد ءَ گھگیری کن ایں دانکہ بلوچستان آجو نہ بیتگ ءُ آدگہ مات ءُ پت چو ماسٹر اکبال ءِ وڑ ءَ رنجانی دیمپان مہ بنت۔
