شال ءَ زوربیگواھیں سگیر اھمد ءِ گھار نسیده بلوچ ءَ پریس کانپریس کرتگ ءُ گوشتگ که من وتی برات سگیر اھمد بلوچ ءُ ناکوزتک اکرار بلوچ ءِ یل کنگ ءِ لوٹ ءَ کنگ آں ءُ دلجم آں که راج گومن ھمگام بیت۔
آئی ءَ گوشتگ که منی برات سگیر اھمد ء گلام کادر بلوچ ءُ اکرار ء جنگیان 11 جون ءِ شپ ءَ پاکستانی پوج ءَ چه اورماڑه ءَ آوار جتگ ءُ بیگواه کرتگ اَنت ، اے ویل ءَ نوزده روچ گوستگ بلے ایانی انگت ءَ هچ وڑیں ھال نیست ۔
نسیده بلوچ ءَ گوشتگ که منی برات سگیر اھمد چه ایشی ءَ پیش یکبرے 20 نومبر 2017 ءَ چه کراچی زانشجاه ءَ چکاس ءِ دیگ ءَ پد بیگواه کنگ بیتگ ، داں یک سالے ءَ چیریں آزارجاھاں رستری آزار دیگ بیتگ ، اے ایوک ءَ دو کھول ءِ گپ نه اِنت بلکیں بلوچستان ءَ ھزارانی کچ ءَ کھولانی ھواریں پریات اِنت که آیاں باز سال اِنت که توار چست کنگ اَنت بلے آیانی توار گوش دارگ بوگ ءَ نه اِنت۔
آئی ءَ گوشتگ که منی برات ءُ ناکوزتک ءِ میار بس ھمیش اِنت که آ وتی کھولاں والینگ ءَ اَنت ءُ بلوچ نودربر اَنت ۔ آمیدگس بے توار اِ نت ، پارلیمنٹ بے میار اِنت ، رسانکدر اے بابت ءَ کار ءَ نه اَنت ، منی ناکوزتک اکرار بلوچ گٹگانی نادراہ ءُ آ الاج کنگ لوٹ ایت، ما ھمے گوشگ لوٹ ایں که اگاں سگیر اھمد ءُ اکرار ءِ سر ءَ چونیں بھتامے ھست گڑا آ امیدگس ءَ پیش کنگ به بنت ، آیاں وکیل ءِ گرگ ءِ موکل دیگ به بیت که گپ کرت به کن اَنت۔
نسیده بلوچ ءَ پریس کانپریس ءِ گڈی ءَ گوشتگ که ما گوں سرکار ءَ لوٹ کن ایں سگیر اھمد ءُ اکرار بلوچ زوت یل کنگ یاں آمیدگس ءَ پیش کنگ به بنت ۔ ھمے وڑ ءَ ما گوں انسانی ھکانی میان استمانی گل ءُ مزن آمیدگس ءَ لوٹ کن ایں کہ اے جیڑھ ءِ بابت ءَ گامگیج به زور اَنت ۔
