بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ زیشان زھیر ءِ ناھکیں کوش ءِ پژر ءَ گوشتگ کہ بلوچستان سرجم ءَ بے مھاریں زوراکیانی آماچ اِنت۔ اے سکا دلپدردیں ویلے کہ زیشان پہ وتی پت ءِ آجوئی ءَ پر ایمنیں زھرشانی کنگ ءَ اَت دوشی پاکستانی پوج ءُ آئی کمکارانی دست ءَ آوار جنگ بیتگ۔ مرچی زیشان ءِ تیرسپتگیں لاش دزکپتگ۔
آئی ءَ گوشتگ کہ اے تھنا یک زاتی ویلے نہ اِنت بلکیں بلوچستان ءَ بلوچانی بگیری ءَ برجاھیں پاکستانی زوراکیانی دردناکیں مسالے۔ وھدے یک زھگے پہ وتی پت ءِ آجوئی ءَ لوٹ کنت گڑا آ ھم بیگواہ کنگ ءُ کشگ بیت۔ اے ریاست ءِ نزام ءِ سنگدلی ءُ زوراکیاں پدر کنت۔
ڈاکٹر نسیم بلوچ ءَ گوشتگ کہ اے درس پمشکا بوگ ءَ اَنت کہ میان استمانی تک بزاں امریکہ، یورپی یونین ءُ آدگہ درسیں جمھوری توانمند انسانی ھکانی پھازداری ءِ ٹاپار ءَ جن اَنت آیانی اے میارباریں بے تواری گیش زوراکی کنگ ءِ کمک ءَ کنت۔ آیانی نادزرسی پاکستان ءَ تچک ءَ کمک کنگ ءُ آ بے ترس ءَ بلوچ ءِ سر ءَ زوراکی کنگ ءَ اِنت۔
