پاکستانی پوج ءِ دست ءَ زوربیگواھیں ڈاکٹر دین مھمد ءِ جنک سمی دین بلوچ ءَ وتی شنگ کرتگیں تامربندے ءَ گوشتگ کہ 28 جون 2025 ءَ منی پِت ڈاکٹر دین جان ءِ زوربیگواھی ءَ شانزدہ سال سرجم بوگ ءَ اِنت۔
آئی گوشتگ کہ اے شانزدہ سال تھنا روچ، ماہ ءُ سال نہ اَنت۔ بلکیں درد ءُ رنج، نا انساپی، بے اوستی ءُ زوراکی ءِ دراجکشیں شپ ءُ سگ ءُ اوپار ءِ چکاس اَنت۔
آئی گوشتگ کہ یکبرے پد ءَ من وتی پرشتگیں اوست ءَ زندگ دارگ ءُ اے نزام ءِ دروازگ ءَ پہ انساپ ءِ پریات ءَ اوشتاتگ آں۔ بلکیں پہ اے جھان ءَ منی پت ءِ زوربیگواھی تھنا یک کوھنیں ھالے یا یک رسمی گالردے جوڑ بوتگ۔ بلے منی گس ءَ داں مرچی ءَ ھم ھما درد ءُ جنجال، ھما ودار ھر روچ زندگ اَنت۔ ما اے زوراکی ءُ نا انساپی بیھال نہ کرتگ کہ آئی مئے زندگی گوں رنجاں مٹ کرتگ۔
سمی دین ءَ گوں درسیں بھرگاں سْیادی داروکیں مردماں گوں لوٹ کرتگ ءُ گوشتگ کہ آ مئے درد ءَ ھوار بہ بنت ءُ ھمک سال ءِ وڑ ءَ اے سال ءَ ھم مئے گون ءَ ھمدردی بہ کن اَنت۔ ھمے درگت ءَ باندا یک تامربندی کمپینے برجم دارگ بیت کہ کسانیں تامربندے ءِ سر ءَ ڈاکٹر دین مھمد بلوچ ءِ آجوئی ءُ آئی کھول ءِ گون ءَ یکجاھی کنگ بیت۔گوں ایشی ءَ ھوار چاگردی رسانکدر ایکس ءَ ھم یک کمپینے برجم دارگ بیت ۔ من گوں چاگردی رسانکدر ءِ کارمرز کنوکیں درسیں مردماں لوٹ کناں کہ آ ایکس ءِ کمپین ءُ تامربندی کمپین ءَ بھر بہ زور اَنت ءُ مئے گونءَ یکجھتی بہ کن اَنت۔
