ھزدار: چہ پاکستانی پوج ءِ چیریں آزارجاھاں بیگواھیں ورنایے آجو بیتگ کہ آئی جاور ناگیگ اَنت۔
زرمبش جھگیر ءِ رد ءَ آجو بیتگیں ورنا ءِ نام زپراللہ ء ھاجی گلام نبی اِنت کہ کوڑاسک ءِ جاہ منند اِنت پاکستانی پوج ءَ 25 مئی 2025 ءَ ھزدار ءَ وتی بنجل ءَ لوٹائینتگ ءُ بیگواہ کرتگ۔ زپر اللہ چہ پاکستانی پوج ءِ چیریں آزار جاھاں 21 جون 2025 ءَ آجو بیتگ کہ آئی جاور سکا ناگیگ اَنت۔ پہ درمان کنگ ءَ ھزدار نادراھجاہ ءَ دیم دیگ بیتگ بلے اود ءَ ڈاکٹراں نہ زرتگ ءُ پہ گیشیں الاج ءَ کراچی ءَ دیم دیگ بیتگ۔
زپر اللہ ءِ بابت ءَ گوشگ بیت کہ یکبرے 29 اکتوبر 2023 ءَ زور بیگواہ کنگ بوتگ اَت چہ بازیں آزاراں پد یل کنگ بوتگ۔ اے آئی دومی رند بوتگ کہ آ بیگواہ کنگ بوتگ۔
