بلوچ یکجھتی کمیٹی ( بی وائ سی ) ءِ جارکش ءَ وتی شنگ کرتگییں درشانے ءَ گوشتگ که بی وائی سی ءِ سروک ڈاکٹر ماه رنگ بلوچ ءُ گل ءِ کارکن بیبو بلوچ 22 مارچ ءَ درکانودی دزگیر کنگ ءُ تھری ایم پی او ءِ رد ءَ شال ءَ هده زندان ءَ بند کنگ بیتگ اَنت ، آیانی بندیگی ءِ سے ماہ ءِ وھد 22 جون ءَ سرجم بیتگ ، بلے چه ایشی ءَ ابید هم انگت یل کنگ نه بیتگ اَنت ، ھمے وڑ ءَ گل ءِ بنجاھی کارکن بیبگر بلوچ ھم 19 مارچ ءَ درکانودی دزگیر کنگ بیتگ که شش روچ زوریں بیگواھی ءَ پد ما25مارچ ءَ شال ءِ ھده زندان ءَ تھری ایم پی او ءِ رد ءَ بند کنگ بیتگ که آئی ءِ وھد ھم 25 جون ءَ سرجم بیتگ۔
بی وائی سی ءَ گوشتگ که ناں که په آیانی یل کنگ ءَ چونیں کانودی کاروائی یے کنگ بیتگ ، ناں که کیس ءِ سر ءَ چار ءُ ٹپاس کنگ بیتگ ءُ ناں که چونیں راھبندی ءُ کانودی منانکے پیش کنگ بیتگ ، اے پاکستان ءِ راھبند آرٹیکل 10 (4) ءِ تچک ءَ بگیری اِنت که ایشی ءِ رد ءَ کسے ءِ 90 روچ ءَ گیش بندیگ کنگ بائد اِنت که گوں آمیدگس ءُ راھبندانی پرمان ءَ به بیت ءُ بندیگ ءَ گپ کنگ ءِ موکل ھم دیگ به بیت۔
آئی ءَ گوشتگ که زندان ءِ سروک اے بابت ءَ چپ ءُ چوٹیں بیان پیش کنگ اَنت ، بلے وھدے که چه زندان ءِ سپرنٹنڈنٹ ءَ جست کنگ بیتگ اَت آئی ءَ ھمے گوشتگ بیت کنت که آیانی بندیگی ءِ وھد ءَ دگه 15 روچ گیش کنگ به بیت بلے اے بابت ءَ آئی ءَ ھچ وڑیں نبشتانک یا کانودی منانک پیش نه کرتگ ، اے رویشت راھبندانی پادمالی ءُ راستی ءِ نه بوگ ءِ نشان اِنت۔
آئی ءَ گوشتگ کہ بژنیگیں گپ ایش اِنت کہ داکٹر ماہ رنگ بلوچ ءُ بیبو بلوچ نہ بلکیں گل ءِ آدگہ سروک بیبگر بلوچ سنگت اللہ شاہ جی، گل زادی بلوچ، ماما گپار بلوچ ءُ امران بلوچ ابید آمیدگس ءِ پرمان ءَ بندیگ اَنت۔ گمان ھمیش اِنت کہ اے مردمانی تھری ایم پی او ءِ وھد ءِ ھلاسی ءَ پد ریاست پہ آیاں درکانودی ھیلہ ءَ کارمرز بہ کنت۔
بی وائی سی ءَ گوشتگ که ما گوں وکیلاں لوٹ کن ایں که آ وتی گوستکانی ربیدگ ءَ برجاه به دار اَنت ، اے کانودی ءُ انسانی ھکانی جیڑھ ءِ بابت ءَ وتی بے تواری ءَ به پروش اَنت ءُ جھد ءِ ته ءَ هوار به بنت۔
بی وائی سی ءَ درشان ءِ گڈی ءَ گوں میان استمانی انسانی ھکانی گلاں لوٹ کرتگ ءُ گوشتگ که آ اے ٹوھیں انسانی ءُ کانودی جیڑھ ءِ ته ءَ دزمانجنی به کن اَنت ، پاکستان ریاست ءِ ادارھاں کڈن به کن اَنت ءُ ڈاکٹر ماه رنگ ءُ بیبو بلوچ ءَ هوار بی وائی سی ءِ سروک ءُ درسیں بلوچ سیاسی کارکنانی درکانودی بندیگی ءِ ھلاس کنگ ءَ وتی کرد ءَ پیلو به کن اَنت۔
