بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے هزدار ءَ زورگریں ریاستی کشنده ٹولی ءِ نزیکیں کارمند ءُ سروک اتاءالرھمان مینگل ءِ کوش ءِ زمه واری ءَ من ایت ، 22 جون 2025 ءَ بی ایل اے ءِ انٹیلیجنس ونگ زرآب ءُ آپریشنل یونٹ پتے اسکواڈ ءَ ھزدار ءِ ھند وڈ ، آڑینجی ءَ یک ھوارین ءُ مھکمیں کاروائی یے ءِ میان ءَ اتاءالرھمان نشانگ کرتگ ءُ گوں سنگتاں ھوار کشتگ ، اے کاروائی زرآب ءِ دراجکشیں وھدے ءَ چیریں ھال ، یکشلیں چارگ ءُ نشانگ ءِ سر ءَ سرجمیں پٹ ءُ پول ءَ پد کار کنگ بیتگ ، ھمے وڑ ءَ آپریشنل یونٹ ءَ کاروائی ءِ گوں سوبمندی ءَ سرجم کنگ ءَ پد مھکمیں وڑے ءَ وتی سنگراں واتر بیتگ۔
آئی ءَ گوشتگ که اتاءالرھمان مینگل چوناھا یک ریاستی چریکے بیتگ که بلوچ ءِ چکچینی ءَ تچک ءَ هوار بیتگ ، آ ٹولی ءِ یک سرگرمیں بھر ءُ جھگیرے بیتگ که پاکستانی پوج ءُ آئی ءِ چیریں ادراھانی سروکی ءَ بلوچستان ءَ بلوچ راجی زرمبشت ءِ بگیری ءَ مھکمیں وڑے ءَ کار ءَ بیتگ ، آئی ءَ گوستگیں بازیں وھداں ریاستی کشنده ٹولی ءِ جوڑ کنگ ، دمگ ءِ ته ءَ کمکاری ءُ بلوچ سیاسی کارکنانی پجارگ ، دزگیری ءُ شھیدی ءَ مزنیں کرد پیلو کرتگ۔ اتاءالرھمان بازیں کچے ءَ بلوچ کارکنانی شھیدی ، زوربیگواھی ءُ چکچینی ءَ تچک ءَ هوار ببتگ ، آ بلوچ نودربر ، کارکن ءُ راجدوستیں گلانی چاریگی ، پجارگ ءُ اُرشانی شوربندی ءَ ریاستی شوندات ءِ یک ٹوھیں بھرے بیتگ ، آئی ءَ نه ایوک ءَ سلاه ، پھازدار ءُ کانودی لب ءُ ملام رستگ بلکیں آئی ءَ وتی ٹکی ءُ پوجی سروکی بے ترس ءَ په بلوچ ءِ دژمنی ءِ کارمرز کنگ ءَ دیگ بیتگ ، ایشی ءِ آسر ءَ سدانی کچ ءَ بلوچ بیگواه ءُ شھید کنگ بیتگ ، ھمے وڑ ءَ دوسد لاش ءَ گیش اتاءالرھمان ءِ سروکی ءَ کل کنگ بیتگ۔
جارکش ءَ گوشتگ که اتاءلرھمان بس ایوک ءَ یک دمگی کارمندے نه بیتگ بلکیں ھما ریاستی شوربندی ءِ درچ بیتگ که آئی ءِ جوڑ کنوک اتاءالرھمان ءِ برات شپیک مینگل ءُ پت نسیر مینگل بیتگ اَنت ، شپیک مینگل 2000 ءِ دھک ءَ ھزدار ، وڈ ءُ آدگه ھنداں گوں ریاستی چیریں ادارھاں ھوار بیتگ ءُ بلوچ گھگیری ءِ بگیری ءَ یک مھکمیں نیٹ ورکے برجاه داشتگ ،که آئی ءِ ته ءَ مھزبی ناشرکاریں ٹولی ، ٹکی جیڑھ ودی کنگ ءُ سیاسی کارکنانی بگیری ءَ ناشرکاری شوندات تچک ءَ کارمرز کنگ بیتگ اَنت ، اے نیٹ ورک ءِ کارانی ءَ آسر ءَ بازیں کچے ءَ بلوچ ورنا یا بیگواه کنگ بیتگ اَنت یا آزار دیگ ءُ بے نامیں مانشاں کل کنگ بیتگ اَنت ، 2014 ءَ چه توتک ءَ دزکپتگیں مچی مانش اے شوربندی ءِ پدریں منانک اَنت ، شپیک مینگل ءُ آئی ءِ ٹولی ءَ بلوچ سیاسی کارکناں ابید شیئه ئیں ھزاره ءُ آدگه مھزبی ٹولی نشانگ کرتگ اَنت که ایشی ءِ مول بلوچ راجی زرمبشت ءِ گوں مھزبی جیڑھاں دچار کنگ ءُ لیکھی نزور کنگ بیتگ۔
آئی ءَ گوشتگ که اتاءالرھمان وتی برات ءِ ٹولی ءِ یک سرگرمے بھرے بیتگ ، آئی ءَ دمگ ءِ ته ءَ سلاه بندیں میارباریں ٹولی ( کشنده ٹولی ) ءِ مھکم کنگ ءَ ٹوھیں کرد پیلو کرتگ ءُ ریاستی ادارھانی په بلوچ چکچینی ءِ تیز کنگ ءَ تچک ءَ کمکاری کرتگ ، آئی ءَ چه زورگریں پوج ءِ نیمگ ءَ یک آجوئیں آپریشنل ٹولی یے ءِ دروشم ءَ کار کنگ ءِ موکل دیگ بیتگ۔
جارکش ءَ گوشتگ که بی ایل اے ءِ انٹیلیجنس ونگ زراب ءَ اتاءالرھمان ءِ درسیں رھوت ، کار ، دمگی شریدار ، چیریں کمکار یک دراجکشیں وھدے ءَ رندگیری کرتگ اَنت ، چه ایشی ءَ بی ایل اے ءَ آئی ءِ نشانگ کنگ ءِ پیسله کرتگ ءُ یک مھکمیں کاروائی یے ءِ پارست ءَ گوں آرزانی ءَ اے راجدروھ ءُ بلوچ کُش ھلاس کرتگ۔
آئی ءَ گوشتگ که چه ایشی ءَ پیش اتاءالرھمان مینگل ءِ برات شپیک مینگل ءِ سر ءَ 30 دسمبر 2011 ءَ بی ایل اے ءِ پدائی بھرگ مجید برگیڈ ءَ پدائی اُرشے کرتگ که مجید برگیڈ ءِ پدائی درویش بلوچ ءَ شال ءَ ارباب کرم هان دگ ءَ آئی ءِ گس ءَ وتی جان ندر کرتگ ءُ آئی ءِ سر ءَ اُرش کرتگ ، شپیک مینگل چه اے اُرش ءَ رک اتگ بلے آئی ءِ بازیں کچے ءَ سنگت کشگ بیتگ اَنت ، آئی ءِ ناشرکاریں ٹولی ءَ سکا تاوان بیتگ۔
جارکش ءَ گوشتگ که ما اے گپ ءَ تچک ءَ گوش ایں که مئے جھد ایوک ءَ لشکری ءُ سلاه بندیں لوٹانی پژدر ءَ نه اِنت بلکیں یک دراجکش ، مھکم ءُ ٹوھیں سیاسی دیرچاری ءِ رد ءَ گھگیری اِنت. ایشی بُنیاد مئے راجی وتواجھی ، گوستانکی زوراکی ءِ بابت ءَ سرپدی ءُ چاگردی سیاسی زانشت ءِ سر ءَ برجاه اِنت ، ما ھچ وڑیں دژمن ءِ پجار ، سیادی یا پوشاک ءِ رد ءَ ناں بلکیں آئی ءِ کار ، کرد ءُ آجوئی زرمبشت ءِ بگیری ءَ کارانی بنیاد ءَ پیسله کن ایں. اتاءالرھمان مینگل ءُ آئی ءِ برات شپیک مینگل آیانی کارانی پارست ءَ گندگ بیتگ اَنت ، آیاں وتی ھمک گام بلوچ ءِ دژمنیں زورگریں ریاست ءِ سیتّانی پھازگ ءُ راجی سیتّانی بگیری ءَ چست کرتگ.
جیھند بلوچ ءَ وتی درشان ءِ گڈی ءَ گوشتگ که بی ایل اے یکبرے پد ءَ گوشگ لوٹ ایت که آ ھچ وڑ ءَ اے ناشرکاراں نہ بکش ایت کہ بلوچ راجی آجوئی ءُ راجی پجار ءِ بگیری ءَ ریاستی شوربندیانی مانزمان بیتگ اَنت۔ ما گوں اتاءالرھمان ءِ نشانگ کنگ ءَ اے گپ تچک کرتگ که بلوچ چکچینی ءَ ھواریں ھچ کس ءَ راجدپتر ءِ پردگ ءِ پشت ءَ چیر بوگ ءِ موکل ءَ نه دے ایں. شپیک مینگل ءُ آئی ءِ پیمیں درسیں کمکار بائد اِنت که نوں اے گپ ءَ به زان اَنت که بلوچ گھگیری ناں که شموش ایت ناں پدکنز بیت. ما دژمن ءِ زوراکیانی ھساب ءَ آئی زبان ءَ بلے وتی شرپ ءُ لیکہ ءِ گون ءَ دے ایں۔
