وائس پار بلوچ مسنگ پرسن ( وی بی ایم پی ) ءِ سرکماش نسر اللہ ءَ وتی درشان ءَ گوشتگ کہ بلوچ نودربر ماہ جبین ءِ زوریں بیگواھی ءَ دو ھپتگ سرجم بیتگ آ انگت ءَ دیم ءَ آرگ ءُ آمیدگس ءَ پیش کنگ نہ بیتگ ءُ نہ آئی کھول ءَ آئی ءِ بابت ءَ سرپدی دیگ بیتگ۔ اے سکا بژنیگ ءُ ڈیھ ءِ کانود ءِ داتگیں شھریانی ھکانی بگیری اِنت ءُ ما ایشی گوں ترندیں دانکاں ایر جن ایں۔
آئی ءَ گوشتگ کہ ما گوں سرکار ءَ یکبرے پد ءَ لوٹ کن ایں کہ اگاں بلوچ نودربر ءِ سر ءَ چونیں بھتامے ھست گڑا وتی آمیدگس ءَ پیش بہ کن ءُ آئی ءَ وتی بےمیار پیش کنگ ءِ موہ دیگ بہ بیت۔ اگاں آ گوں دگہ درکانودی کارے ءَ ھوار بیتگ گڑا ڈیھ ءِ کانود ءِ رد ءَ سزا دیگ بہ بیت گڑا مارا دگہ ھچ گپ نیست۔ بلے آ ءُ آئی برات یونس بلوچ ءِ زوریں بیگواھی ڈیھ ءِ کانود ءُ انسانی ھکانی بگیری اِنت، ایشی بگیری ءَ وائس پار بلوچ مسنگ پرسن ءَ ڈیھ ءِ کانود ءِ رد ءَ زھرشانی کنگ ءِ ھک ھست۔
نسر اللہ ءَ گوشتگ کہ دانکہ بلوچ نودربر ماہ جبین ءُ آئی برات دیم ءَ آرگ نہ بیتگ ءُ پد ءَ یل کنگ نہ بیتگ گڑا وائس پار بلوچ مسنگ پرسن ھمک روچ ءِ بنیاد ءَ پہ آیانی آجوئی ءَ توار چست کنت۔
آئی ءَ گوں درسیں بھرگاں سیادی داروکیں مردماں لوٹ کرتگ ءُ گوشتگ کہ آ ھمک روچ رسانکدر ءَ یک یک پوسٹے بہ کن اَنت ءُ آئی زوریں بیگواھی ءِ بگیری ءَ توار چست بہ کن اَنت۔
