بلوچ یکجھتی کمیٹی ءَ ماں رسانکدر ءَ وتی شنگ کرتگیں درشانے ءَ گوشتگ کہ گل ءِ بنجاھی آرگنائزر ڈاکٹر ماہ رنگ بلوچ، بنجاھی کمیٹی ءِ کارکن بیبرگ بلوچ، سبگت اللہ شاہ جی، گل ءِ کارکن بیبو بلوچ، گلزادی بلوچ ءُ بلوچ سْیاسی سروک ماما گپار بلوچ ءُ سروک امران بلوچ ءِ کیس مزن آمیدگس ءَ یاداشت کرتگ اَنت۔
آئی گوشتگ کہ بلوچ سروک ءُ سْیاسی کارکناں گوستگیں سئے ماہ اِنت کہ ریاستی ادارھانی دست ءَ درکانودی بند اَنت ، آیاں نوآباد کاریں وھد ءِ کانود، تری ایم پی او ءِ رد ءَ زندان ءَ بندیگ اَنت۔ بلوچ یکجھتی کمیٹی ءَ اے دزگیریانی بگیری ءَ سْیاسی زرمبشت ءَ ھوار کانودی راہ گچین کرتگ ءُ بلوچستان مزن آمیدگسءَ شُتگ اَت۔
آئی گوشتگ کہ انگت بلوچستان مزن آمیدگس ءِ دو وکیلاں انساپ دیگ ءِ جاہ ءَ دمگ ءِ وتگڑیں سرکار ءُریاستی چیریں ادارھانی وش کنگ دوست داشتگ ءُ ایشی آسر ءَ کیس داں دو ماہ ءَ سر ءَ گوازینتگ ءُ پد ءَ ھلاس کرتگ۔
آئی گوشتگ کہ بلوچ یکجھتی کمیٹی ءَ ھائی کورٹ ءِ اے پیسلہ ءِ بگیری ءَ سپریم کورٹ ءَ لوٹے یاداشت کرتگ۔ مارا ستک اِنت کہ آمیدگس سرکار ءُ چیریں ادارھانی زور ءُ دزمنانجنی ءَ مان نیار ایت ءُ کانود ءُ انساپ ءِ رد ءَ پیسلہ دنت۔
بی وائی سی ءَ گوشتگ کہ ما تچک ءَ گوش ایں کہ کانودی جھد ءَ ھوار مئے سْیاسی زرمبشت ھم گیش دیم ءَ روت ءُ ما اے زوراکی ءُ ناانساپی ءِ سر ءَ بے توار نہ بہ ایں۔
