تربت: آپسر، بنڈ ءِ بازار ءِ جاہ منند سپا اللہ ء مولا بکش ءِ کھول ءَ آئی ناھکیں کوش ءِ بگیری ءَ کیچ دمگدار ءِ کارگس ءِ دیم ءَ زھرشانی کرتگ۔ زھرشانی ءَ جنین ءُ زھگاں بازیں کچے ءَ بھر زرتگ۔
آیانی گوشگ اِنت کہ سپا اللہ 20 مئی ءَ پاکستانی پوج ءَ آوار جتگ، 29 مئی ءَ اناگت ءَ ایپ آئی آر نبشتگ کہ آ میڑے ءَ جنگ بوتگ، اے تچک ءَ یک دروگیں گپے۔
آیانی گوشگ اِنت کہ سپااللہ آوار جنگ ءَ پد کشگ بیتگ بلے اے ویل ءَ دروگیں میڑ ءِ نام ءَ دیگ ءُ چیر دیگ ءِ جھد ءَ کنگ ءَ اِنت۔
آیاں گوشتگ کہ مئے دگہ ھم ورنایے شاھجان 14 مئی ءَ آوار جنگ بوتگ کہ انگت ءَ آئی ھچ وڑیں ھال نیست۔ ما ھمے لوٹ ءَ کن ایں کہ شاھجان زوت یل کنگ بہ بیت ءُ سپا اللہ ءِ کوش ءِ بابت ءَ پٹ ءُ پول کنگ بہ بیت۔
آیاں گوں سرکار ءُ انسانی ھکانی گلاں لوٹ کرتگ ءُ گوشتگ کہ آ اے جیڑہ ءِ بابت ءَ دلگوش ءَ گور بہ کن اَنت ءُ پہ بیگواھیں مردمانی آجوئی ءَ گامگیج بہ زور اَنت۔
