بلوچ یکجھتی کمیٹی ءِ سروک ءُ زوربیگواھیں ڈاکٹر دین مھمد ءِ جنک سمی دین ءَ وتی شنگ کرتگیں درشانے ءَ گوشتگ که پنچ روچ پیش که من وتی کھول ءِ ھمراھی ءَ وتی ھنکین مشکے ءَ شتگ آں ، پاکستانی پوج ءَ مئے میتگ انگرّ ءَ کرتگ ، داں بیست ءُ چار اَدار ءَ گوں کیمره ، چاریگی ڈرون ءُ آدگه چاریگی ساماناں مئے رندگیری کنگ بیتگ ، سرجمیں شپ ءَ مئے اوتاگ ءِ ڈن ءَ تھتانی سر ءَ ٹارچ جنگ بیتگ ، منی تر ءُ تاب دارگ ءُ منی نام ءِ پارست ءَ درسیں سیاد جتائیں وڑ ءُ دروشم ءَ تُرسینگ ، بیھار دیگ ءُ آزار دیگ بیتگ اَنت۔
آئی ءَ گوشتگ که منی میتگ ءِ درسیں گس پٹ ءُ پول کنگ بیتگ اَنت ، مردینانی اکس گِرگ ءُ جنینانی پجار کارڈ پچ گِرگ بیتگ اَنت ، مردم داں باز اَداراں گرم ءِ سر ءَ دارگ بیتگ اَنت ،منی دو ناکوزتک که نودربر بیتگ اَنت پہ زوردزگیر کنگ ءُ پوج ءِ بنجل ءَ برگ بیتگ اَنت ، چه آیاں یکے 24 اَدار ءَ سکا آزار دیگ ءَ پد یل کنگ بیتگ ءُ دومی انگت ءَ بیگواه اِنت۔
آئیءَ گوشتگ که منی سیادپہ زور پوج ءِ بنجل ءَ برگ ءُ آیانی زوریں تامربند گرگ بیتگ که آئی ءِ ته ءَ من ” سمی دین ” ناشرکارے لیکگ بیتگاں که اے دروگ ءُ زوریں منانکے ، اے وڑیں رپک که آئی ءِ رد ءَ من ءُ منی کھول ناشرکار نامینگ ، آزار دیگ ، بیھار دیگ ءُ دروگیں تامربندانی پارست ءَ نشانگ کنگ بوگ ءَ اِیں ادارھانی ترس ءُ نزوری ءَ پدر کنت که په وتی نزوریانی چیر دیگ ءَ چه دروگیں ھیلَھاں کمک زورگ ءَ اِنت۔
سمی دین ءَ گوشتگ ما کہ اے پیمیں مچی آزارانی گپ ءَ جنگ ءَ ایںآ زوربیگواھی بہ بیت یا سیاسی ءُ انسانی ھکانی کارکن بوگ ءِ میار ءَ نزیکیں مردمانی بیگواه کنگ ، آزار دیگ یا بیھار دیگ ، اے اولی رند نه اِنت۔ منی سیاد تھنا منی گون ءَسیادے ءِ بنیاد ءَ نشانگ کنگ بوتگ اَنت ، پیسر ءَ هم منی کھول ءِ مردم داں باز ماہ ءُ سالاں زوربیگواه کنگ بیتگ اَنت ، آ در انسانی آزار دیگ بوتگ اَنت ، بس پمشاکه آ منی نزیکیں آزیز اَنت۔
آئی ءَ گوشتگ که اے رند ءَ ھم منی سیاد ءُ مردمانی نامینگ ، زوریں پٹ ءُ پول کنگ ، آزار دیگ ءُ زوریں بیگواھی ءِ مول بس منی جانی ناں بلکیں چاگرد ءِ ته ءَ منی نزور کنگ اِنت. منی کھول ءَ منی جھد ءِ رد ءَ مچی آزار دنت که من زوراکی ءِ آماچ به باں دانکه چہ وتی راھبندی کار ، وتی توار ءُ جھد ءَ پدکنز به باں۔
سمی دین ءَ گڈی ءَ گوشتگ که من ھمے سرپد باں که ریاستی اداره ءُ پوج گوں اے وڑیں دروگیں ھیله ، آزار ، کوش ءِ بیھار ، مچی سزا ءُ آزاراں جھد کنگ ءَ اَنت که من ءُ منی سنگتاں پہ بے توار کنگ ءَ لاچار به کن اَنت ، بلے اے چوناھا منی ایمنیں جھد ءِ دیم ءَ ریاستی ادارهانی نادزرسی ءُ نزوری ءِ پدریں منانک اِنت. اے درسیں ھلیلہ بے سوب بیتگ اِنت ءُ ما ھچ وڑ ءَ بے توار نه به اِیں ، ناں بلوچستان ءَ برجاھیں ریاستی رستری ءُ زوراکی ءِ بگیری ءَ وتی توار ءِ چست کنگ ءَ بند کن اِیں. مئے جھد داں زوراکی ءُ نا ھکی ءِ گڈی نشان ءِ ھلاس بوگ ءَ برجاه بیت۔
