بلوچ وومن پورم ءِ جارکش ءَ نواب ھیربکش مری ءِ یازدھمی سالروچ ءِ درگت ءَ ماں رسانکدر ءَ وتی شنگ کرتگیں درشانے ءَ آئی ءَ ستک شانی ندر کرتگ ءُ گوشتگ که آئی ءَ وتی سرجمیں زند په بلوچ ءِ راجی سیتّاں بکشاتگ ، آئی ءِ ھیال ءُ جھد په ھما باندات ءَ بیتگ که راج چه ھر وڑیں پدمنتگی ءُ زوراکی ءَ به رک ایت۔
آئی ءَ گوشتگ که بابا مری ءِ زند ءُ آئی ءِ لیکھ په آھوکیں پدریچ ءَ یک رھشونی یے بلوچ راج ءِ تپاکی ءُ شرپ ءَ گیش ءَ چه گیش مھکم کنت. بابا ھیربکش مری ءُ شھید نواب اکبر ھان بگٹی ءِ میان ءَ راجی تپاکی ءِ بابت ءَ یکشلیں گپ ءُ ھواریں پگر ھمے گپ ءِ منانک اِنت که بابا مری یک ھم سنتیں راجی لیکھے ءِ سروک بیتگ۔
جارکش ءَ گوشتگ که بابا مری مدام ھمے گپ ءِ بگیر بیتگ کہ پیسری ردی پد ءَ کنگ بہ بیت ءُ چه آیاں راج ءَ تاوان بیت.آئی ءَ چه گوست ءَ دربرتگ ءُ یک نوکیں لیکھی بنیادے جوڑ کرتگ که چه ایشی ءَ آ نوکیں بلوچ راجدوستی ءِ سروکاں چه یکے لیکگ بیت۔
آئی ءَ گوشتگ که بابا مری ءَ ھما دیمروی رد کرتگ کہ آ نزوریں راجانی گیشتر لٹ ءُ پل ءَ بہ کنت۔ آئی ءِ بے تواری ھم یک انچیں زھرشانی یے جوڑ بیتگ که آئی ءَ گوں بلوچ ءِ دژمنیں درشاناں دیم په دیم کرتگ۔
بلوچ وومن پورم ءَ وتی درشان ءِ گڈی ءَ گوشتگ که آئی ءِ راجی واھشت ءَ سرجم ءَ من اِیں ءُ گوں سرجمیں بلوچ سیاسی گلاں لوٹ کن اِیں که آ زوراکی ءِ بگیری ءَ یکجاه به بنت ءُ یک مھکمیں راجی یکمشتی یے جوڑ به کن اَنت۔
