بلوچ لبریشن آرمی (بی ایل اے) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں زامران ءَ زورگریں پاکستانی پوج، چیریں ادارھانی کارمند ءُ کشندہ ٹولی ءِ سروک مھمد امین گوں زھگ ءَ ھوار کشتگ۔
آئی گوشتگ کہ زامران ءِ ھند گربُن ءَ بی ایل اے ءِ سرمچاراں دژمن ءِ چریک مھمد امین ءِ گاڑی گوں تراکناکیں شورھاں نشانگ کرتگ۔ چہ ایشی آسر ءَ آ گوں وتی بچک نوید امین ءَ ھوار مرتگ ءُ آئی گاڑی سرجم ءَ تباہ بوتگ۔
جارکش ءَ گوشتگ کہ مھمد امین پاکستانی پوج ءِ چیردستی ءَ کشندہ ٹولی ءِ سروکی ءَ کنگ ءَ بوتگ کہ زامران ءُ کش ءُ پھناتاں پوج ءِ زوراکیاں ھوار بوگ ءُ زوربیگواھی، ورناھانی نشانگ کنگ ءُ شھید کنگ ءَ ھوار بوتگ۔ اے ٹولی ءَ چہ اے کارانی بدل ءَ پوج ءِ نیمگ ءَ منشیات ءِ باپاری ءِ سرجم ءَ موکل دیگ بوتگ۔
آئی گوشتگ کہ مھمد امین ءِ سروکی ءَ ھمے سلاہ بندیں ٹولی براس ءِ سرمچارانی شھیدی ءَ سرجم ءَ ھوار بوتگ۔ جولائی 2018 ءَ زامران جالگی ءَ سرمچار ھسین شھسوار پنام چیسل ءُ ھنیپ لال پنام استاد شوھاز ءِ شھیدی، ءُ جنوری 2020 ءَ ناگ ءَ ناجد بلوچ پنام سلیم، میران بلوچ پنام داد جان، شکیل بلوچ پنام جیھند، دولت بلوچ پنام باران ءُ یوسپ بلوچ پنام دودا ءِ شھیدی ءَ ھوار بوتگ۔
جارکش ءَ گوشتگ کہ ھمے میارانی سوب ءَ مھمد امین سک دیر اِنت کہ بی ایل اے ءِ نشانگ ءَ بوتگ ءُ انوں آ گڈی آسر ءَ سر کرتگ۔
آئی گوشتگ کہ دژمن ءِ چریک مھمد امین ءَ نشانگ کنگ ءِ وھد ءَ دو راھگوز ٹپی بوتگ کہ اے یک ویلے بوتگ۔ ما گوں راج ءَ دزبندی کن ایں کہ مھمد امین ءِ وڑیں چریکاں چہ وت ءَ دور بہ دار اِت دانکہ چہ جانی ءُ مالی تاوان ءَ بہ رک اِت۔
جارکش ءَ گوشتگ کہ زامران ءِ ھند کُنٹگان، گربُن، سیرکزہ، درابُلی، سْیاھ گسی ءُ کش ءُ پھناتاں لھتیں مردم پاکستانی پوج ءِ سروکی ءَ سرمچارانی راھانی چارگ ءُ بُندْرانی درگیجگ جھد کنگ ءَ اَنت۔ آیاں کڈن کن ایں کہ آ چہ اے کار ءَ وت ءَ دور بہ دار اَنت اگاں ناں گڑا آ مئے سرمچارانی نشانگ ءَ بنت ءُ وتی تاوان ءِ زمہ وار وت بہ اَنت۔
