بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که سرمچاراں نوشکے، کلات، مستونگ ءُ شال ءَ چار جتائیں اُرشاں پاکستانی پوج ءِ 12 کارمند ءَ ھوار یک چریکے کشتگ، اِے اُرشاں چیرکرتگیں شورھانی بمب تراک ءُ سلاه بندیں اُرش ھوار اَنت.
آئی ءَ گوشتتگ که زی سرمچاراں نوشکے ءِ ھند دو سئے ءَ مزنین شھدگ ءِ نزیک ءَ زورگریں پاکستانی پوج ءِ گاڑی یے ھما وھد ءَ گوں چیرکرتگیں شورھاں نشانگ کرتگ که دژمن ءِ کارمند گوں دو گاڑی ءَ روگ ءَ بیتگ اَنت.
جارکش ءَ گوشتگ که تراک ءِ آسر ءَ زورگریں پوج ءِ گاڑی سرجم ءَ تباه ءُ سواریں 9 کارمند جاھی مرتگ اَنت.
آئی ءَ گوشتگ که مرچی بی ایل اے ءِ سرمچاراں کلات ءِ ھند منگچر ءَ زانشجاه ءَ زورگریں پوج ءِ برجاهیں چوکی ءِ کارمند ھما وھد ءَ اُرشے ءَ نشانگ کرتگ اَنت که آ ھمے دمگ ءَ مُچ بیتگ اَنت ، سرمچاراں گوں وتکاریں سلاهانی کارمرز کنگ ءِ ھواری ءَ گرنیڈ لانچر ءِ بازیں گولا آس داتگ که ایشی ءِ آسر ءَ زورگریں پوج ءِ سے کارمند جاھی مرتگ ءُ کم چه کم چار ٹپی بیتگ.
جارکش ءَ گوشتگ که بی ایل اے ءِ سرمچاراں دوشی مستونگ ءَ سی سی ایم دوراھی ءَ زورگریں پوج ءِ پھازداریں کارمند گوں دستی بمب ءَ نشانگ کرتگ اَنت ، که ایشی ءِ آسر ءَ سے کارمند ٹپی بیتگ، اے دمگ ءَ زورگریں پوج ءِ کارمند دگ ءَ گاڑیانی پٹ ءُ پول ءِ نام ءَ لس مردماں کم شرپ کنگ اَنت، جنین ءُ کماشاں داں بازیں اَداراں دار اَنت ءُ آیانی ازت ءَ کم شرپ اَنت۔
آئی ءَ گوشتگ که بی ایل اے ءِ سرمچاراں 3جون ءَ شال ، سریاب دگ ءَ تارک نادراھجاه ءِ نزیک ءَ زورگریں پوج ءِ چریک ، گلزار ء نسیر دھوار شال کرانی دگ ءِ جاه منند اِنت اُرشے ءَ کشتگ.
جارکش ءَ گوشتگ که گلزار نسیر ءَ په زورگریں پوج ءَ چاریگی کنگ ءِ ھواری ءَ مردم لب داتگ ءُ رد داتگ اَنت ءُ په دژمن ءَ چاریگی کنگ ءَ کارمرز کرتگ اَنت، کشگ بیتگیں چریک ءَ بلوچ ورناھانی زورگریں پاکستانی پوج ءِ دست ءَ زوربیگواه کنگ ءَ تچک ءَ هوار بیتگ.
آئی ءَ گوشتگ که بی ایل اے ءِ سرمچاراں نومبر 2023 ءَ چه شال ءَ دژمنیں پوج ءِ چریک مکبول سمالانی دزگیر کرتگ که آ بی ایل اے ءِ باسکے بیتگ، بلے چه ایشی ءَ پد آئی ءَ چیریں دروشمے ءَ دژمن ءِ دیم ءَ لگور بیتگ ءُ راجی میارباری کرتگ، مکبول سمالانی سرمچارانی سر ءَ ڈرون اُرش ءَ پاکستانی پوج ءِ کمک بیتگ ، بلے سرمچار چه اے اُرش ءَ رکّ اِتگ اَنت ، چه ایشی ءَ پد اِے چریک سرمچاراں یکبرے پد ءَ رندگیری کرتگ ءُ دزگیر کرتگ۔
جارکش ءَ گوشتگ که چریک مکبول سمالانی ءَ من اِتگ که آئی ءِ رھوت گوں شال ءِ جاه منندیں گلزار نسیر ءَ بیتگ ءُ آ گوں پاکستانی چیریں ادارھانی کارمنداں پجاروک کرتگ ءُ سرمچارانی ڈرون اُرش ءَ نشانگ کنگ ءِ شوربندی ءَ ھوار بیتگ۔
آئی ءَ گوشتگ که اے کارانی سوب ءَ گلزار نسیر دھوار ، بی ایل اے ءِ نشانگ ءَ بیتگ که گوستگیں روچاں سرمچاراں کشتگ ءُ گڈی آسر ءَ سر کتگ۔ جیھند بلوچ ءَ وتی درشان ءِ گڈی ءَ درسیں اُرشانی زمه واری من اتگ
