شال: په زوربیگواھیں مردمانی پد جنگ ءَ وی بی ایم پی ءِ برجاھیں زھرشانی گدان ءَ 5849 روچ سرجم بیتگ ، سے شمبے ءِ روچ ءَ زوربیگواھیں ابدالگنی بلوچ ءِ برات ابدالکیوم گدان ءَ اتکگ ءُ وتی برات ءِ زوریبگواھی ءِ کیس یاداشت کرتگ۔
آئی ءَ گوشتگ که منی برات ایم پل ءِ نودربر ، نیشنل ڈیموکریٹک پارٹی ( این ڈی پی ) ءِ سروک ءُ یک سیاسی کارکنے بیتگ که گوستگیں ماه ءِ 25 ءَ گوں المنیر ٹرانسپورٹ ءِ بس ءَ چه شال ءَ دیم په کراچی ءَ روگ ءَ بیتگ، وھدے که بس ھزدار ءَ سر بیتگ چہ کادری ھوٹل ءِ دیم ءَ پوج ءَ بس داشتگ ءُ مساپرانی دیم ءَ دزگیر کرتگ ءُ بیگواه کرتگ.
ابدالکیوم ءِ گوشگ اِنت که گوں ھزدار ءِ انتزامیه ءَ ابدالگنی ءِ بابت ءَ باز رند ءَ گپ کرتگ آئی ءَ نه منی برات ءِ ارزی نبشتگ نه آئی ءِ بابت ءَ مارا سرپدی داتگ ، چه ایشی ءَ کھول سکا آزارانی دیمپان اِنت.
وی بی ایم پی ءِ سرکماش نسرالله بلوچ ءَ گوں دمگ ءِ سرکار ءَ لوٹ کرتگ که اگاں ابدالگنی ءِ چونیں بھتامے ھست آ گڑا آمیدگس ءَ پیش کنگ ءُگپ کنگ ءِ موکل دیگ به بیت ، اگاں بے میار اِنت آئی ءِ یل کنگ ءِ بابت ءَ دلجمی دیگ به بیت دانکه آئی ءِ کھول چه جنجال ءَ به رک ایت۔
