بلوچ اسٹوڈنٹس ایکشن کمیٹی ءِ بنجاھی جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ نوکیں سال ءِ بندات ءَ کتاب میڑہ بلوچستان کتاب کاروان تیوگیں بلوچستان ءَ برجاہ اِنت، جتائیں جاھاں کتاب میڑہ برجاہ دارگ بوتگ اَنت۔
آئی ءَ دیمتر ءَ گوشتگ کہ گوستگیں سے روچانی تہ ءَ کلات، ھزداد، پسنی، پیشکان، بل نگور، دشت، شاپک، ھیرونک، بارکان، کوھلو، نوکنڈی ءَ ھوار جتائیں ھنداں کتاب میڑہ بوتگ اَنت۔ بچک ءُ جنکیں نودربر، لبزانکار، استاد، چاگردی مردمانی ھواری ءَ جتائیں بھرگاں سیادی داروکیں مردم کتاب اسٹالاں آتکگ اَنت ءُ وتی دل ءِ تبیں کتاب اِش زرتگ اَنت۔
جارکش ءَ وتی درشان ءِ گُڈی ءَ گوشتگ کہ بلوچستان کتاب کاروان انچوش بیت بلوچستان ءَ درسیں کنڈاں سر بوتگ، اے کمپئین آؤکیں روچاں جتائیں ھنداں برجاہ بنت۔ باند ءَ سوراب ءَ کتاب میڑہ جنگ بیت۔
