بلوچ وومن پورم ءِ جارکش ءَ ماں رسانکدر ءَ وتی شنگ کرتگیں درشانے ءَ 24 سالی جنکیں نودربر ماه جبین بلوچ ءِ زوربیگواھی ایر جتگ ءُ اے انسانی ھکانی بگیری لیک اِتگ۔
آئی ءَ گوشتگ که ماه جبین بلوچ بلوچستان زانشجاه ءَ لائبریری سائنس ءِ نودربر اِنت که پرندوشی ادار 3 ءِ نزیک ءَ سی ٹی ڈی ءُ ریاستی کارمنداں چه شال سول نادراھجاه ءَ آوار جتگ ءُ بیگواه کرتگ۔
جارکش ءَ گوشتگ که پیسر ءَ ریاستی ادارھاں بلوچ راج ءِ مردین ، زھگ ءُ کماش زوربیگواھی ءِ نشانگ کرتگ اَنت بلے نوں بلوچ جنیناں ھم ھمے درچ ءِ رد ءَ نشانگ کنگ اِنت ، که اِے بلوچ ربیدگ ، مردمگری ءُ راجی بستار ءِ سرجم ءَ بگیری اِنت۔
آئی ءَ گوشتگ که ما مدام ھمے لوٹ کرتگ که ریاستی اداره وتی زور ءُ توان ءَ په ناشریں کاراں کارمرز مه کن اَنت بلے آ ایشی ءِ جاه ءَ انسانی ھکانی پادمالی ءَ گیش کنگ اَنت. گوستگیں روچاں بی وائی سی ءِ بازیں سروک ءٗ کارکن یکبرے بیگواه کنگ ءُ پد ءَ تھری ایم پی او ءِ رد ءَ دزگیر کنگ بیتگ اَنت ، اِے کار په جنیناں ھم کنگ بیتگ که اِے بژنی گپے.
بلوچ وومن پورم ءِ جارکشءَ درشان ءِ گڈی ءَ ماه جیبن بلوچ زوت ءُ گوں سلامتی ءَ یل کنگ ءِ لوٹ کرتگ ءُ گوشتگ که میان استمان ، بلوچ راج ءِ سر ءَ در انسانی ءُ درکانودی کارانی بگیری ءَ گامگیج به زیر ایت. بلوچ راج اِے زورکیانی بگیری ءَ گھگیری کنت ءُ ریاستی ادارھاں اے زوراکیانی بابت ءَ جست گیت۔
