بلوچ راجدوستیں جھدکار ءُ بی این ایم ءِ پیشیگیں بنجاھی پتر ءِ باسک مھمد یوسپ بلوچ ءَ وتی شنگ کرتگیں درشانے ءَ گوشتگ کہ من بلوچ راجی رسانکدر زرمبش ءِ کلیں جھد کاریں سنگتاں گوں دل ءِ جھلانکیاں مراد باتی دیاں کہ پہ زرمبش ءِ دیمروی ءَ باز جھد اِش کرتگ۔ پہ اے پر آشوبیں جنز ءَ بلوچ راجی توار ءِ دنیا ءِ کنڈ کنڈ ءَ سر کنگ ءَ شپ ءُ روچ مھنت کتگ۔ اے تنگدستی ءِ ِوھد ءَ پہ زورگر ءِ بلوچ چکچینی ءِ بگیری ءَ بلوچ راج ءِ سر ءَ زورگریں دژمن ءِ زوراکیانی آشکار کنگ ءَ رسانکدر ریڈیو زرمبش ءَ زرمبش ٹی وی پچ کرتگ۔
آئی ءَ گوشتگ کہ من چہ سنگتاں ھمے اوست ءَ داراں کہ پہ بلوچ راجی توار ءِ آشکار کنگ ءَ وتی شپ ءُ روچ گام جناں بنت ءُ پہ ریڈیو زرمبش ءُ زرمبش ٹی وی ءِ دیمروی ءَ جھد کن اَنت ءُ دیم پہ منزل ءَ جنزاں بنت۔
یوسپ بلوچ ءَ گوشتگ کہ من گوں پارٹی ءُ بلوچ راج ءَ دزبندی کناں کہ زرمبش ادارہ ءَ ھرپیمیں کمک بکن اَنت۔
