بلوچ یکجھتی کمیٹی ءَ ماں رسانکدر ءَ وتی شنگ کرتگیں درشانے ءَ گوشتگ کہ بی وائی سی ءِ سروک ڈاکٹر ماہ رنگ بلوچ، بنجاھی سروک شاہ جی سبگت اللہ، بیبگر بلوچ، بیبو بلوچ ءُ گلزادی بلوچ ءِ زندان ءَ شدکشیں ھرتال ءَ چار روچ سرجم بوتگ، شدکشیں ھرتال ءِ سوب ءَ آیانی جاور روچ پہ روچ گنتر بوان اَنت۔
آئی ءَ گوشتگ کہ بیبو بلوچ ءِ چہ ھدہ زندان شال ءَ پشین ءَ برگ ءُ سی ٹی ڈی ءُ پولیس کارمندانی زندان ءَ پترگ ڈاکٹر ماہ رنگ، بیبو ءُ گلزادی بلوچ ءِ آزار دیگ ءِ بگیری ءَ ڈاکٹر ماہ رنگ، بیبو، گلزادی، شاہ جی ءُ بیبرگ بلوچ شدکشیں ھرتال ءَ نشتگ اَنت۔
آئی ءَ گوشتگ کہ مرچی ھمے وڑ ءَ پاکستان ریاست ءَ مئے سروکانی گون ءَ زندان ءَ زوراکی ءِ گنتریں درور برجاه داشتگ، ما ھم بلوچ راج ءِ بستار ءَ زوراکی ءَ وتی یاداشت ءِ تہ ءَ جاگھ دیگ ءَ ایں۔ ما نہ چہ اے زوراکی ءَ شموشکار بہ ایں ءُ نہ پاکستان ریاست ءَ بکش ایں۔ مرچی تونگری ءِ نشه ءَ سر ریچیں ریاست چو اَپس ءَ زندان ءِ تہ ءَ بلوچ جنیناں زوراکیانی نشانگ کنگ ءَ اِنت ءُ آیاں یکشل ءَ ترسینگ ءَ اِنت، بلے اے زور مدام برجاہ نہ بیت۔ ھمے وڑ ءَ ناشر ءُ زوراکیں ریاستانی منانک جھان ءِ گوستانک ءَ تچک اَنت۔ ما مرچی اے ریاست ءَ تچک ءَ گوشگ لوٹ ایں کہ بلوچ راجی رھشونانی سر ءَ زندان ءَ بیوکیں زوراکیانی بیر ءَ بلوچ راج گوں وتی مچی زور ءُ لس مردمانی توان ءَ گیت۔ بلوچ راج اے زوراکیاں ھچ وڑ ءَ بے ھال نہ کنت۔
آئی ءَ گوشتگ کہ ما گوں بلوچ راج ءِ درسیں سْیاسی ءُ چاگردی ٹولی ءُ گلاں لوٹ کن ایں کہ اے زوراکی ءِ بگیری ءَ گوں بلوچ یکجھتی کمیٹی ءَ ھمراھداری بہ کن اِت۔
