بلوچ یکجھتی کمیٹی ءِ سروک سمی دین ءَ بلوچستان ءِ وتگڑیں مزن وزیر سرپراز بگٹی ءِ نیمگ ءَ جتگیں بھتامانی پژدر ءَ ماں رسانکدر ءَ وتی شنگ کرتگیں درشانے ءَ گوشتگ کہ پہ مئے پر ایمنیں زرمبشت ءِ شکی کنگ ءَ مدام رسانکدر ءِ کمک ءَ دروگ بند اَنت، مرچی ھم پد ءَ ھما دروگ ءَ بندگ ءَ اَنت۔ داں انوں چنچو بھتام جنگ بیتگ چہ آیاں یکے راست نہ بیتگ۔ چہ ایشی ءَ ابید ھم دروگ بندگ ءَ بس نہ کن اَنت۔
سمی دین ءَ سرپزار بگٹی ءِ تامربند ءِ بابت ءَ گوشتگ کہ اے تامربند ءَ بلوچستان ءِ انوگیں مزن وزیر سرپراز بگٹی منی نام ءِ سر ءَ ٹاپار جنگ ءَ اِنت۔ ھما تامربند ءَ بیار اِت کہ سمی دین پاکستان ءَ ماندارگ ءَ اِنت۔ بزاں پاکستان ءِ بیرک ءَ ماندارگ ءَ اِنت، آئی ھساب ءَ اے تامربند ھم آئی کِر ءَ ھست۔
آئی ءَ گوشتگ کہ سرپراز بگٹی ءَ گوں چیلنج ءَ گوش آں کہ آ ھما تامربند ءَ بیار ایت۔ ھمے بہ گوش ایت کہ اے کدی ءُ کجام جاہ ءَ جوڑ کنگ بیتگ۔ اگاں آ اے بھتام ءَ راست بہ کنت گڑا من وت وت ءَ کانود ءِ دست ءَ دیان ءُ ھمک کانودی کاروائی ءِ دیمپانی ءَ کن آں۔ بلے آئی پیش کرت نہ کرت ( من زاناں کرت نہ کنت ) گڑا زوت دزکش بہ بیت۔
سمی دین ءَ گوشتگ کہ ریاست ءِ آمیدگس ءِ زمہ واری بیت کہ آ اے دروگ ءُ ردیں گپانی سر ءَ سرپراز بگٹی ءِ بگیری ءَ کانودی کاروائی بہ کنت۔ اے ھژدری اِنت کہ راست، دروگ ءُ بھتام ءِ پرک لس مردمانی دیم ءَ پدر بہ بیت۔ اے تماشہ ءَ نوں بند بوگ لوٹ ایت۔ اگاں دروگیں بھتامانی بنیاد ءَ ما ءُ مئے مردم آوار جنگ بہ ایں، یا دزگیر کنگ بہ ایں گڑا کانود ءَ پہ درساں یک وڑ ءَ بوگ لوٹ ایت۔
