کراچی: پاکستانی لشکر ءِ دست ءَ زور بیگواہ کنگ بیتگیں سرپراز بلوچ ءِگھار ھانی بلوچ گوں وتی کھول ءِ آدگہ مردمانی ھمراھی ءَ کراچی پریس کلب ءَ پریس کانپریس کرتگ ءُ گوشتگ کہ سرپراز بلوچ ءِ زوریں بیگواھی ءَ چل ءُ پنچ روچ سرجم بیتگ کہ انگت ءَ آئی ھچ وڑیں ھال نیست۔
آئی ءَ گوشتگ کہ منی برات 26 پروری 2025 ءَ برانی نادراھجاہ ءِ دیم ءَ سادگ پوشاکیں لشکری کارمنداں آوار جتگ۔ آ پہ وتی نادراھیں ناکو ءِ چارگ ءَ نادراھجاہ ءَ اتکگ ءُ پہ ورگ ءِ زورگ ءَ ڈن ءَ در اتکگ کہ لھتیں مردماں آ پہ زور گاڑی ءَ سوار کرتگ۔ اے ویل نادراھجاہ ءِ دیم ءِ دکاندار ءَ گوں وتی چماں دیستگ۔
ھانی بلوچ ءَ گوشتگ کہ سرپراز بلوچ یک ایمن دوستیں شھری یے ءُ زمہ واریں مردمے، آ گوں ھچ وڑیں درکانودی کاراں ھمگرنچ نہ بیتگ۔ رمزان ءُ آئید ءِ وڑیں شادمانی ما ابید سرپراز ءَ گوازینتگ اَنت۔ چہ آئی بیگواھی ءَ مات بے واب اِنت ءُ گھار مدام پریات ءُ زاری کنگ ءَ اَنت ءُ سرجمیں گس پرسیگ اِنت۔
آئی ءَ گوں ریاستی ادارہ،آمیدگس ءُ انسانی ھکانی گلاں دلگوش گور کرتگ ءُ گوشتگ کہ اگاں سرپراز ءِ سر ءَ چونیں ھم بھتامے ھست گڑا آ پرچا آمیدگس ءَ پیش کنگ نہ بیت۔
