بلوچ یکجھتی کمیٹی ءِ سروک سمی دین ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچستان ءَ زوریں بیگواھی ءُ درکانودی کوش ءِ درچ برجاہ اِنت۔ 28 پروری ءَ مشکے ءَ یک میتگے ءَ پاکستانی لشکر ءَ بیڑ برتگ ءُ ھشت ورنا آیانی کھول ءِ دیم ءَ آوار جتگ ءُ بیگواہ کرتگ۔ دو مارچ ءَ بیگاہ ءِ سے ءَ چار ورنا کامران الیم، مھراج، مومن اسلم ءُ ھپیز ءِ تیرسپتگیں لاش چہ جنگلے ءَ دست کپتگ اَنت۔
آئی ءَ گوشتگ کہ آدگہ چار ورنایانی کھول پہ آیانی زندگیاں ترسگ ءَ بیتگ اَنت ءُ پد ءَ آیانی گمان راست بیتگ۔ لھتیں روچاں پد چاریں ورنایانی ژانگولیں لاش دزکپتگ اَنت۔
سمی دین ءَ گوشتگ کہ 5 اپریل ءَ چہ مشکے ءَ دگہ سے زور بیگواھیں مردمانی لاش دزکپتگ اَنت کہ آ دروگیں میڑ ءَ کشگ ءُ آیانی لاش چگل دیگ بیتگ اَنت۔ ھمے روچ ءَ چہ بارکان ءَ سے ورنا ھک نواز بزدار، شیرو بزدار ءُ گل زمان بزدار ءِ لاش دزکپتگ اَنت کہ آ جتائیں وھداں زور بیگواہ کنگ بیتگ اَنت۔
آئی ءَ گوشتگ کہ 6 اپریل ءَ چہ بلیدہ ءِ ھند گردانک ءَ سھب ءَ مھلہ دو ورنا مھراب ء رھمدل ءُ ھان مھمد ء ھیبتان چہ گس ءَ آوار جتگ ءُ لھتیں ادارانی میان ءَ نشانگ کرتگ ءُ کشتگ اَنت۔ دوئیں ورنا یکیں کھول ءِ مردم اَنت۔
سمی دین ءَ گوشتگ کہ ھمے درچ ءَ ھزدار ءِ ھند باگبانہ ءَ پاکستانی لشکر ءَ سے ورنا ءِ دروگیں میڑ ءَ کشگ ءِ ٹاپار جتگ۔ چہ آیاں یکے ابدُلمالک ء مھمد یوسپ ءِ نام ءَ پجارگ بیتگ کہ آئی امر بیست ءُ ھشت سال اِنت۔آ 11 اکتوبر 2024 ءَ چہ تربت ءَ زور بیگواہ کنگ بیتگ۔
آئی ءَ گوشتگ کہ 7 اپریل ءَ نادر بلوچ ء شیر مھمد کہ آ پاکستانی لشکر ءَ پیسر ءَ آوار جتگ اَت ءُ رند ءَ آئی لاش کھول ءِ دست ءَ دیگ بیتگ۔ 8 اپریل ءَ پنجگور ءَ یک ویلے ءَ لشکر ءِ تیرگواری ءَ بھادر شپی نامیں مردمے بیران، سھیل، شاید ءُ پرھان نامیں سے ورنا ٹپی بیتگ۔
بی وائی سی ءِ سروک ءَ گوشتگ کہ بلوچستان یک نیمگے ءَ یک مچی مانشے جوڑ بیتگ ءُ اود ءَ ھمک روچ لاش دزکپگ ءَ اَنت ءُدومی نیمگ ءَ سیاسی سروک، کارکن ءُ توار چست کنوک نشانگ کنگ بوگ ءَ اَنت کہ آ ریاستی زوراکی ءُ انسانی ھکانی لگتمال کنگ ءِ بگیری ءَ توار چست کن اَنت۔
آئی ءَ گوشتگ کہ ماہ رنگ بلوچ بیبو بلوچ ءُ گلزادی ءَ ھوار بازیں سیاسی کارکن دزگیر کنگ بیتگ اَنت کہ ریاست آیانی بے توار کنگ ءِ جھد ءَ اِنت۔
سمی دین ءَ گوشتگ کہ بلوچستان ءِ گیش بیوکیں زوریں بیگواھی ءُ درکانودی کوش تیوک ءَ انسانی ھکانی بگیری نہ اِنت بلکیں اے سرجمیں چاگرد ءَ سکا آزردگ کنت۔ ٹپ چہ زوراکی ءَ نہ چہ انساپ ءَ دراہ بنت۔
