کیچ: ھپتگے پیش زورگریں پاکستانی لشکر ءِ دست ءَ زور بیگواہ کنگ بوتگیں ورنا اوزیر ءِ کھول ءَ آئی آجوئی ءِ لوٹ کرتگ۔
کھول ءِ گوشگ اِنت کہ اوزیر ء مھردل تمپ ءِ میتگ گومازی ءِ جھمنند اِنت پاکستانی لشکر ءَ 1جنوری 2024 ءَ شپ ءِ دو ءَ چہ آئی جند ءِ گِس ءَ آوار جتگ ءُ بیگواہ کرتگ۔
آئی ءَ گوشتگ کہ اوزیر ءِ زوریں بیگواھی ءَ ھپتگے گوستگ بلے انگت ءَ آئی ءِ بارو ءَ کھول ءَ ھچ وڑیں سرپدی دیگ نہ بوتگ کہ کج ءَ اِنت۔ چہ اوزیر ءِ زوریں بیگواھی ءَ تیوگیں کھول سک گمیگ اِنت۔
کھول ءَ گوشتگ کہ اویز ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔ اگاں بے میار اِنت گڑا زوت یل کنگ بہ بیت۔
کھول ءَ گوں سرکار ءُ مردمی ھکانی ادارھاں لوٹ کرتگ ءُ گوشتگ کہ زور بیگواھیں اویز ءِ آجوئی ءَ وتی کرد ءَ پیلو بہ کن اَنت۔
