تربت: چہ گوادر ءَ پاکستانی لشکر ءِ دست ءَ زور بیگواہ کنگ بیتگیں نسار کریم ءِ کھول ءَ تربت پریس کلب ءَ پریس کانپریس کرتگ ءُ گوشتگ کہ نسار کریم 30 جولائی 2023 ءَ چہ رویل ہوٹل گوادر ءَ آوار جنگ بوتگ انگت ءَ بیگواہ اِنت، ما پہ نسار کریم ءَ آجوئی ءَ ھمک در ٹک اتگ ءُ اسلام آباد ءَ نندانک داتگ ءُ تربت ءَ ھم شھید پدا چار راہ ءَ نندانک داتگ ءُ دمگدار کارگس ءِ دپ ءَ ھم نندانک ءَ نشتگ ایں۔ مارا چہ سرکار ءِ نیمگ ءَ سدکی دیگ بیتگ کہ نسار کریم داں ھپتگے ءَ یل کنگ بیت بلے انگت ءَ آئی ھچ وڑیں ھال نیست۔
آئی ءَ گوشتگ کہ ما چد ءُ ساری ھم پرنس کانپریس کرتگ بلے نندانک ءِ وھد ءَ ما ھمے گوشتگ کہ اگاں نسار کریم ءَ چونیں میارباری یے کرتگ گڑا آمیدگس ءَ آرگ ءُ پیش کنگ بہ بیت، بلے آئیءَ دومی سال سرجم بوگی اِنت کہ بیگواہ اِنت۔
آئی ءَ گوشتگ کہ ما پہ نسار کریم ءَ ھمک در ٹک اتگ ءُ ما ھر جاہ توار چست کرتگ بلے مارا ابید دروگیں دلبڈی ءَ دگہ ھچ نہ رستگ ۔ چوش کہ ما ھمے سوڑگ کرتگ ءُ شمئے رد ءَ سرکار ءَ گوشگ لوٹ ایں کہ اگاں نسار کریم داں سے روچ ءَ یل دیگ نہ بوت گڑا ما ڈی بلوچ ءَ سی پیک دگ ءَ بند کن این ءُ نند ایں دانکہ سرکار نسار کریم ءَ یل بہ دنت، ما ھمے اوست ءَ دار ایں سرکار مئے گپاں گوشدار ایت ءُ نسار کریم ءَ آجو کنت چشکہ اگاں آئی ءَ چونیں ھم میارباری یے کرُتگ گڑا دیم ءَ آرگ ءُ آمیدگس ءَ پیش کنگ بہ بیت، اگاں آئی سر ءَ چونیں میارے بوتءُ آئی ءَ چونیں سزا دیگ بوت ما رازیگ ایں۔
