بلوچ یکجھتی کمیٹی ءِ سروک ڈاکٹر ماہ رنگ ءِ گھار نادیہ بلوچ ءَ چلتن دامن ءَ برجاھیں زھرشانی نندانک ءَ تران کرتگ ءُ گوشتگ کہ من وتی گھارڈاکٹر ماہ رنگ ءِ کیس وتی راج ءِ دیم ءَ ایر کرتگ۔ چہ پاکستان ءِ آمیدگس ءِ نزام ءُ میان استمانی اداراھاں ھچ وڑیں اوست ءَ نہ داراں چی ءَ کہ چہ ایشی پیش مارا مئے پت ءِ لاش دیگ بیتگ، بلے پاکستان ءِ آمیدگس ءِ نزام ءُ میان استمانی ادارھاں مارا انساپ دات نہ کرتگ۔
آئی ءَ گوشتگ کہ ڈاکٹر ماہ رنگ نہ تیوک ءَ یک مردمے بلکیں پگر ءُلیکھے، مرچی ھما پگر ءُ لیکہ بندیگ کنگ بیتگ۔ بلے مارا وتی راج ءُ وتی مردمانی سر ءَ پھر اِنت کہ پہ ڈاکٹر ماہ رنگ ءَ توار چست کنگ ءَ اَنت۔ شما توار چست بہ کن اِت ءُ بے توار مہ بہ اِت چی ءَ کہ ڈاکٹر ماہ رنگ راج ءِ رھشون اِنت۔ آئی ءَ زوراکیانی بگیری ءَ توار چست کرتگ ءُ زوراکانی دیم پہ دیمی ءَ اوشتاتگ۔ مرچی آئی ءَ شمئے توار درکار اِنت۔پہ ڈاکٹر ماہ رنگ، بیبرگ بلوچ، شاہ جی ءُ بیبو توار چست بہ کن اِت۔
نادیہ بلوچ ءَ گوشتگ کہ ڈاکٹر ماہ رنگ تیوک ءَ منی گھار وتی مات ءِ جنک نہ بیتگ بلکیں سرجمیں راج ءِ رھشون اِنت۔ اگاں آئی ءَ تیوک ءَ وتی کھول ءِ گم بوتیں گڑا ما داشتگ اَت۔ بلے آئی ءَ وتی درسیں وائشت پہ وتی راج ءَ ببا داتگ اَنت ءُ وتی راج ءِ توار جوڑ بیتگ۔
آئی ءَ دیمتر ءَ گوشتگ کہ چہ مکران ءَ بگر داں سیستانءَ درسیں مردمانی منتواراں کہ آ درکپت اَنت۔ من سردار اکتر مینگل ءِ منتواراں کہ گوں وتی راج ءَ اوشتاتگ۔
