بلوچ وومن پورم ءِ سروک ڈاکٹر شلی بلوچ ءَ ماں چاگردی رسانکدر ایکس ءَ وتی شنگ کرتگیں درشانے ءَ گوشتگ کہ ایمنیں زھرشانی کنگ کانودی ھک اِنت ایشی ریاست اچما پل اِت نہ کنت۔ بلے اد ءَ مارا پہ وتی بنیادی ھکاں پاد آھگ ءُ یکجاہ بوگ ءَ یکشل ءَ بیھار دیگ بیت ءُ زوراکیانی دیمپان بہ ایں۔ دانکہ ریاست پہ پھریزگ ءَ دلجمی نہ دنت ما ھم نہ نند ایں ءُ بے توار نہ بہ ایں۔
آئی ءَ گوشتگ کہ مرچی بلوچ وومن پورم ءَ پہ بلوچ یکجھتی کمیٹی ءِ سروکانی بندیگ کنگ ءُ چہ ایمنیں زھرشانیاں دارگ ءِ بگیری ءَ زھرشانی روانک ءِ جار جتگ اَت ریاستی ادارھاں زھرشانی کنوکانی گوں جتائیں ھیلھاں دارگ ءِ جھد کرتگ۔ آئی ءَ مارا چہ ھمے کسانیں اوست ءَ زبھر کرتگ، بلے ما چہ اے درساں بے توار نہ بہ ایں چی ءَ کہ ھما مئیگ اِنت ما آئی ءَ لوٹ ایں۔
ڈاکٹر شلی ءَ گوشتگ کہ زھرشانی کنوکانی بیھار دیگ، ھندی گاڑیانی دارگ ءُ زھرشانی ءَ ھوار بیوکیں راہ بند کنگ بیتگ اَنت، بلے آواران ءَ چونیں ھم زوراکی یے ءِ بگیری ءَ توار چست کنگ ءَ مردمانی جوزگ ءَ داشت نہ کنت۔ ما ھمے گوشگ ءَ ایں کہ مئے زھرشانی ایمن اِنت ءُ راھبند ءِ رد ءَ اِنت۔
آئی ءَ گوشتگ کہ ما ڈاکٹر ماہ رنگ، لالا وھاب، سبگت اللہ شاہ جی، سمی دین ءُ آدگہ بندیگیں بی وائی سی ءِ سروکانی آجوئی ءِ لوٹ ءَ کنگ ءَ ایں۔ ما ریاستی ادارھاں گوشگ لوٹ ایں کہ پہ پر ایمنیں زھرشانیانی دارگ ءَ اڑاند ودی مکن ءُ پروش دیگ ءِ جھد ءَ مکن اِت۔
