بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ ماں چاگردی رسانکدر ایکس ءَ اکتر مینگل ءِ کاروان ءِ سر ءَ ارش ءِبابت ءَ نبشتگ کہ سردار اکتر مینگل پہ بلوچستانءِ آجوئی ءَ روانک ءَ در نہ کپتگ بلکیں تیوک ءَ بنکی شھری ءُ انسانی ھکانی لوٹ کنت۔ بلے پاکستان ریاست آئی اوپار نہ کنت۔ انگت ءَ اکتر مینگل پاکستان ءِ راھبند ءِ رد ءَ سیاست کنگ ءُ وتگڑیں پاکستان ریاست ءِ سر ءَ سدک اِنت، بلے بلوچستان ءَ سیاست ءِ سر ءَ پابندی اِنت۔ ھمے سوب ءَ مرچی آئی کاروان نشانگ کنگ بیتگ۔
آئی ءَ گوشتگ کہ من مستونگ ءَ سردار اکتر مینگل ءِ کاروان ءُ زھرشانی نندانک ءِ سر ءَ وتکش ارش ءَ گوں ترندیں دانکاں ایر جن آں۔ پر ایمنیں زھرشانی کنوکانی سر ءَ چو ناشریں وڑے ءَ ارش کنگ لس بلوچانی جھد ءِ دارگ ءَکوشست اِنت۔
ڈاکٹر نسیم بلوچ ءَ گوشتگ کہ اے ارش ھما وھد ءَ کنگ بیتگ کہ سرداراکتر مینگل ءُ آئی ھمبل پہ ڈاکٹر ماہ رنگ بلوچ، سمی دین بلوچ، بیبو بلوچ، بیبرگ بلوچ ءُ پہ آدگہ کارکنانی درکانودی دزگیری ءِ بگیری ءَ شال ءَ زھرشانی ءَ روگ ءَ بیتگ اَنت۔ پہ ایمنیں زھرشانی ءِ دارگ ءَ زور ءِ کارگرگ بلوچستانءَ گیش بیوکیں زوراکیانی دگہ منانکے۔
آئی ءَ گوشتگ کہ من اے ناشرکاری ءِ زمہ وار پاکستان ریاست ءَ لیک آں آئی ءَ انچیں چاگردے ودی کرتگ کہ اود ءَ بلوچ کارکن یکشل ءَ ترس آماچ کنگ بنت۔
بلوچ نیشنل موومنٹ ءِ سرکماش ءَ گوشتگ کہ من گوں میان استمانی ا نسانی ھکا نی گلاں لوٹ کن آں کہ آ بلوچستان ءَ برجاھیں زوراکیانی سر ءَ دلگوش بہ کن اَنت۔
ڈاکٹر نسیم بلوچ ءَ گوشتگ کہ پاکستان ھمک ھما توار ءِ دارگ ءِ جھد ءَ کنت کہ آ پہ راجی گھگیری ءَ چست بیتگ یا پہ راجی مول ءَ کسانیں پلہ مرزی یے پیش دار ایت۔
