بلوچ نیشنل موومنٹ ( بی این ایم ) ءَ بلوچستان ءِ سر ءَ پاکستان ءِ زوگپتی ءِ ھپتاد ءُ ھپتمی سالروچ ءِ سرجم بوگ ءَ ھنور جرمنیءَ زھرشانی کرتگ ءُ روانک کش اتگ ۔ روانک ءَ بی این ایم ءِ باسکاں بلوچستان ءِ جاورانی سر ءَ گپ جتگ ءُ آیان ءَ پلے کارڈ دستاں بیتگ ءُآیاں بلوچستان ءِ جاورگوں اوگاماں آشکار کرتگ اَنت۔ آیاں ماہ رنگ، بیبگر، بیبو ءُ آدگہ دزگیر بیتگیں سروکانی دزگیری ایر جتگ ءُ آیانی آجوئی ءِ لوٹ کرتگ۔
زھرشانی ءَ شرھسن، ندیم سلیم، سادک سئید ءُ رھمان بلوچ ءَ تران کرتگ۔
آیاں گوشتگ کہ بلوچستان یک زورگپتیں ڈیھے ایشی سر ءَ پاکستان ءَ 27 مارچ 1948 ءَ پہ زور ءُ رد دیگ ءِ پارست ءَ دستیگ کرتگ۔ چہ ایشی ءَ پد بلوچ یکشل ءَ زوراکیانی دیمپانی ءَ کنگ ءَ اِنت۔ بلے بلوچ راج اے زوریں زورگپتی ءَ نہ من ایت ءُ پہ وتی آجوئی ءَ گھگیریءَ برجاہ دار ایت۔
آیاں شال ءَ انوگیں ریاستی زوراکی، زوریں بیگواھی ءُ 22 مارچ ءَ سریاب دگ ءَ پہ زور بیگواھیں مردمانی آجوئی ءَ بیوکیں زھرشانیءِ سر ءَ پاکستانی لشکر ءِ تیرگواری ایر جتگ ۔ اے ارش ءَ سے مردم شھید ءُ درزنانی کچ ءَ ٹپی بیتگ اَت۔ وھدے کہ ریاستی لشکر ءَ پہ ٹپی بیتگیں مردمانی نادراھجاہ ءَ برگ ءَ اڑاند ودی کرتگ اَت ءُ لس مردمانی سامان تاوان داتگ اَنت۔ تران کنوکاں ایش ریاستی ناشرکاری ءِ گنتریں منانک لیک اتگ۔
بلوچستان ءِ گوستانک ءِ سر ءَ گپ کنان ءَ آیاں گوشتگ کہ آجوئی جھد 1839 ءَ چہ برتانہ ءِ ارش ءُ ھان بلوچ مھراب ھان ءِ شھیدی ءَ بندات بیتگ۔ 11 اگست 1947 ءَ برتانیہ ءَ بلوچستان ءِ آجوئی ءِجار جتگ اَت۔ بلے پاکستان ءَ سپارتی زور ءُ پندالانی رد ءَ ایشی ءِ زورگپتی ءِ جھد کرتگ۔ دسمبر 1947 ءَ بلوچستان پارلیمنٹ ءَ بازیں کچے ءَ گوں پاکستان ءَ ھوار بوگ رد کرتگ ءُ پہ وتی آجوئی ءِ برجاہ دارگ ءَ زور داتگ۔ بلے 27 مارچ 1948 ءَ پاکستان ءَ چہ وتی لشکر ءِ ارشءَ بلوچستان دستیگ کرتگ۔
آیاں گوشتگ کہ بلوچ 27 مارچ ءَ سیاھیں روچے ءِ ھساب ءَ دار ایت ءُ پہ وتی آجوئی ءِ گرگ ءَ گھگیری ءَ برجاہ دار ایت۔
آیاں گوں میان استمان ءَ لوٹ کرتگ کہ آ پاکستان ءِ زوراکی ءِ بگیری ءَ توار چست بہ کن اَنت ءُ بلوچستان ءِ آجوئی جھد ءِ پلہ مرزی ءَ بہ کن اَنت۔
