بلوچ یکجھتی کمیٹی ءِ سروک سمی دین ءِ گھار ءُ زوربیگواھیں ڈاکٹر دین مھمد ءِ جنک مھلب دین بلوچ ءَ وتی مات ءَ ھمرائی ءَ کراچی پریس کلب ءَ کانپرس کرتگ ءُ گوشتگ که بی وائی سی چه کراچی پولیس ءُ ریاستی ادارھانی نیمگ ءَ بلوچ زالبولانی سر ءَ بیتگیں رستری زوراکیاں ایر جنت. گوستگیں روچ ءَ کراچی ءَ ایمنیں زھرشانی ءِ سر ءَ پولیس ءَ بیڑ برتگ ءُ زوراکی کرتگ. جنین دگانی سر ءَ گِرّان کرتگ اَنت، آیانی گشان چِک اِتگ اَنت ءُ آ درکانودی دزگیر کرتگ اَنت. اِے درکانودی کِرد ریاست ءِ ناشریں دروشم ءَ پدر کنگ ءَ اِنت ، ھمے وڑ ءَ بلوچ راج یکشل ءَ زوراکی ءِ دیمپان اِنت.
آئی ءَ گوشتگ که سمی دین زی گوں آدگه بلوچ زالبول ءُ زھرشانی کنوکاں دزگیر کنگ بیتگ ءُ مرچی آمیدگس ءِ گشگ ءِ بنیاد ءَ یل کنگ بیتگ. آمیدگس ءِ پرمان ءِ بنیاد ءَ سمی دین ءُ آدگه جنین یل کنگ بیتگ اَنت بلے وھدے که سمی دین ءُ آدگه جنین چه آمیدگس ءَ دراتکگ ءُ وتی گسانی نیمگ ءَ روگ ءَ بیتگ اَنت کراچی پولیس ءَ آمیدگس ءَ ڈن یکبرے پد ءَ سمی دین ءِ دزگیر کنگ ءِ جھد کرتگ که وکیلانی سنتّ ءَ سکا گھگیری کرتگ. وکیلاں داں باز اداراں پولیس ءِ درکانودی کار ءِ دیم ءَ اوشتگ ءِ جھد کرتگ بلے گڈسر ءَ انساپ ءَ ریاستی زوراکی ءِ دیم ءَ پروش وارتگ.
مھلب دین ءَ گوشتگ که کراچی پولیس ءَ آمیدگس ءِ پرمان ءِ مان نیارگ ءَ دگه بازیں پولیس کارمند لوٹائینتگ ءُ سمی دین یکبرے پد ءَ دزگیر کرتگ. اِے ریاستی ادارھانی ناشرکاری اِنت که راھبند ءُ آمیدگس ءَ پادمال کنگ اَنت ءُ بلوچ جنیناں نشانگ کنگ اَنت. چه ایشی ءَ اَبید درکانودی ءُ درانسانی رپک کارمرز کنگ بوگ ءَ اِنت.
آئی ءَ گوشتگ که ما تچک ءَ گوش اِین که اگاں سمی دین زوت یل کنگ نه بیت ءُ بلوچ زالبولانی سر ءَ زوراکی ءِ درچ برجاه دارگ به بیت گڑا بلوچ راج ءُ بلوچ یکجھتی کمیٹی ترندیں گامگیجے ءِ زورگ ءَ لاچار بنت اگاں ریاست وتی زوراکیاں بند مه کنت آئی ءِ آسر ءِ سرجمیں زمه وار سرکار، سند پولیس ءُ آدگه ریاستی ادارھانی سر ءَ بنت.
مھلب دین ءَ گوں راج ، وکیلانی سنت ، انسانی ھکانی گل ، سیاسی ءُ چاگردی کارکن ءُ درسیں انساپ دوستیں شھریانی ءَ گون ءَ لوٹ کرتگ که په سمی دین ءِ زوت ءُ تچک ءَ یل کنگ ، بلوچ سیاسی کارکنانی بگیری ءَ ریاستی زوراکیانی بند کنگ ءُ میار باریں سروگانانی بگیری ءَ گامگیج زور ، کراچی پولیس ءُ آدگه ریاستی ادارھانی نیمگ ءَ آمیدگس ءِ پرمانانی ایر جنگ ءِ سر ءَ گامگیج زورگ ءُ درکانودی کارانی بگیری ءَ رھبند ءِ بنیاد ءَ کاروائی کنگ بہ بیت، ھمے وڑ ءَ میان استمانی انسانی ھکانی گلانی اِے بابت ءَ گامگیج زورگ ءُ په بلوچ زالبولانی ایمنی ءِ بابت ءَ دلجمی دیگ ءَ گامگیج بزور اَنت.
آئی ءَ پریس کانپرس ءِ گڈی ءَ گوشتگ که بلوچ زالبولانی کم شرپ کنگ سرجمیں بلوچ راج ءِ کم شرپ کنگ اِنت. ما ھچ وڑ ءَ ایشی ءَ نه منّ اِیں.
