بلوچ نیشنل موومنٹ ( بی این ایم ) ءِ پیشیگیں سرکماش ھلیل بلوچ ءَ گوشتگ کہ شال ءَ برجاھیں زھرشانی ءِ سر ءَ ارش، زھرشانی کنوکانی کوش ءُ مرچی بی وائی سی ءِ سروک ڈاکٹر ماہ رنگ ءَ ھوار آدگہ زھرشانی کنوکانی زوریں بیگواھی ھمے راستی ءِ منانک اِنت کہ پاکستان یک زورگرءُ لٹ ءُپلیں ریاستے ءُ بلوچستان یک زورگپت ءُ نوک آبادکاریں دمگے۔ ھاں بلوچستان الم زورگپت اِنت بلے کٹگ نہ بیتگ مرچی ھم ھک ءِ جنگ برجاہ اِنت۔
آئی ءَ گوشتگ کہ پاکستان ریاست بلوچ راج ءِ بگیری ءَ چکچینی ءُ سیاست ءِ دارگ ءِ تکشام ءَ کارگرگ ءَ اِنت۔ ڈاکٹر ماہ رنگ بلوچ یک باسما، زانوگر ءُ گپ زانتیں توارے۔ آ گوں آدگہ مردمانی ھواری ءَ زور بیگواہ کرتگ ءُ ریاست ءَ ھمے راستی پیش داشتگ کہ بلوچ راجی زانشت ءُگھگیری ءَ ریاست ءِ بنیاد جکسینتگ۔ نوں جاور انچوش اَنت کہ جنین ءُ زھگ ھم زوریں بیگواھیءِ آماچ کنگ بوگ ءَ اَنت اے ریاست ءِ ترس ءُ پروش ءِ تچکیں منانک اِنت۔
ھلیل بلوچ ءَ گوشتگ کہ پاکستان ریاست ءِ شوندات ھمیش اِنت کہ ھمک باسمائیں بلوچ ءَِ بے توار بہ کنت یا ھلاس بہ کنت، نوں گپ چہ شک ءَ گوستگ۔ بلوچستان ءَ پاکستانی لشکر ھمک گھگیری ءَ پہ زور ھلاس کنگ لوٹ ایت۔ اے کار نوں یک نوکیں ھونیگیں درے ءِ نیمگ ءَ شتگ۔ ما اے زوراکی ءَ نہ تیوک ءَ رد کن ایں بلکیں جھان ءَ ھمے سدکی ءَ دے ایں کہ بلوچ راجی شھیدانی ھون ، بندیگانی کرد ءُ زور بیگواھیں مردمانی دیمونی ءُ بے تواریں جھد ءِ مز راجی آجوئی اِنت ۔ مرچی ما چہ گوست ءَ گیش مھکم، باسما ءُ مھکم توکل ایں۔ بلوچ راجی زرمبشت وتی گچین کرتگیں منزل ءِ لوٹانی گون ءَ ھمگرنچیں کارشونیانی بنیاد ءَ جنزان اَنت۔
