کابل: اوگانستان ءِ دری کارانی جارکش ابدُلکھاربلکی ءَ پاکستانی لشکر ءِ نیمگ ءَ اوگانستان ءِ سرءَ بی ایل اے ءِ باھوٹی جاہ دیگ ءُ جاپر ایکسپریس ارش ءَ ھوار بوگ ءِ بھتام گوں ترندی ءَ رد کرتگ۔
تالبان دری کارانی جارکش ءِ گوشگ اِنت کہ اوگان سرکار پاکستانی لشکر ءِ جارکش ءِ نیمگ ءَ بلوچستان ءَ یک مساپر ٹرینے ءِ سر ءَ بیتگیں ارش ءَ گوں اوگانستان ءَ ھمگرنچ کنگ ءِ بے بنیادیں بھتام ءَ گوں ترندی ءَ رد کنت ءُ پاکستان سرکار ءَ زور دیں کہ اے وڑیں بے سریں گپانی جاه ءَ وتی پھازداری ءُ تھی جیڑھانی گھتر کنگ ءِ بابت ءَ دلگوش بہ دے۔
آئی ءَ گوشتگ کہ بلوچ آجوئی لوٹوکیں چونیں ھم باسکے اوگانستان ءَ ساڑی نہ اِنت ءُ گوں اسلامی امارات ءَکدی ھچ وڑیں ھمگرنچی نہ بیتگ ءُ نیست۔
آئی ءَ گوشتگ کہ مارا اے ویل ءَ بے میاریں مردمانی جانانی زوال بوگ ءَ بژن اِنت کہ پہ وتی سیاسی مول ءَ لس شھریانی کوش ھچ وڑ ءَ شر نہ اِنت۔
