بلوچ راجی آجوئی سنگر ( براس ) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ کہ براس ءِ سرمچاراں کوھلو ءِ ھند کاھان ءَ پہ زوراکی کنگ ءَ آھوکیں زورگریں پاکستانی لشکر ءِ کارمندانی سر ءَ ارش کرتگ۔ چہ ایشی ءَ 13 کارمند مرتگ ءُ 8 ٹپی بیتگ۔ سرمچاراں پاکستانی لشکر ءِ گون ءَ دیم پہ دیمی جنگ داتگ ءُدژمن ءَ گیش جانی ءُ مالی تاوان داتگ۔ ھمے میان ءَ براس ءِ سرمچار سنگت گلام رسول مری پنام منشی ایدو شھید بیتگ۔
آئی ءَگوشتگ کہ بارکان ءِ ھند گلو شمچودی ءَ 23 پروری 2025 ءَ زورگریں پاکستانی لشکر ءِ کارمندانی کاروان پرپٹ، گاڑی ءُ پیادگ ءَھمے ھند ءَ پہ زوراکی ءَ آھگ ءَ بیتگ اَنت کہ اود ءَ سرمچاراں سنگر گپتگءُ جتائیں جاھاں پاکستانی لشکر ءِ سر ءَ ارش کرتگ۔ اے ارشاں زورگریں پاکستانی لشکر ءِ پنچ کارمند جاھی مرتگ، چہ گیشتریں تاوان ءَ پد دژمنیں لشکر پدکنز بیتگ۔
جارکش ءَ گوشتگ کہ براس ءِ سرمچاراں شوربندی ءِ رد ءَ وتی یک انچائیں بنجلے دژمن ءَِ را پیش داشتگ۔ زوراکی ءِ دومی روچ ءَ زورگریں لشکر ءَ پٹءُ پول کرتگ ءُ ھمےجاہ ءَ سر بیتگ، اود ءَ براس ءِ سرمچاراں چہ دو جتائیں نیمگاں ترندیں ارش بندات کرتگ۔ اے ارشاں دگہ دژمنیں لشکر ءِ ھشت کارمند مرتگ ءُکم چہ کم ھشت کارمند ٹپی بیتگ۔ زورگریں پاکستانی لشکر ترس آماچ بیتگ ءُ وتی پرپٹ یل کرتگ اَنت ءُ جستگ۔
آئی ءَ گوشتگ کہ زوراکی ءِ میان ءَچہ سرمچارانی ارشانی آسر ءَ جانی تاوان بوگ ءَ پد زورگریں پاکستانی لشکر ءَ لس آبادی نشانگ کرتگ۔ دژمنیں لشکر ءِ گسانی سوچگ ءَ ھوار ھشت مردم آوار جتگ ءُ بیگواہ کرتگ ءُ ھمے ھند ءِ ورگی سامان بند کرتگ اَنت۔
جارکش ءَ گوشتگ کہ زورگریں پاکستانی لشکر ءِ گون ءَ دیم پہ دیمی میڑ ءَ بلوچ راجی آجوئی سنگر ( براس ) ءِ سرمچارسنگت گلام رسول مری پنام منشی ایدو شھید بیتگ۔ آئی لاش براس ءِ سرمچاراں گوں لشکری شرپ ءَ گلزمین ءِمیار کرتگ۔
آئی ءَ گوشتگ کہ براس ءِ ھم سنتیں گل بی ایل اے ءِ ھمبلیں شھید گلام رسول پنام منشی ایدو ء پیز مھمد مری چمالنگءِ جاہ منند اِنت۔ آ بی ایل اے ءِ مجید برگیڈ ءِ بنداتی پدائی شھید باز ھان مری پنام درویش ءِ برات اِنت۔ شھید گلام رسول مری گوستگیں پانزہ سال اِنت گوں بلوچ راجی آجوئی ءِ جھد ءَ بندوک بیتگ۔ آ بولان، کوھلو، کاھان ءُ آدگہ ھنداں وتی پرز ءِ پیلو کنگ ءَ بیتگ۔
جارکش ءَ گوشتگ کہ شھید سنگت گلام رسول مری پنام منشی ایدو چہ وتی جنگی بودناکیانی سوب ءَ بی ایل اے ءِ بنداتی گچینی ٹولی اسپیشل ٹیکٹیکل آپریشنز اسکواڈ ( ایس ٹی او ایس ) ءِ باسکءِ بستار ءَ راجی ایردستی ءَِ بگیری ءَ کار ءَ بیتگ۔ آئی چنچو مزنیں جنگاں دژمن پروش داتگ ۔
آئی ءَ گوشتگ کہ بلوچ راجی آجوئی سنگر( براس ) شھید گلام رسول بلوچ ءَ آئی گرانبھائیں شھیدی ءَ سک شانی ندر کنت ءُ ھمے کول ءَ کنت کہ شھیدیں ھمبلانی کاروان ءَ ھرھال ءَ گڈی منزل ءَ سر کن ایں ءُ بلوچستان ءِ آجوئی ءِ واب ءَ پیلو کن ایں۔
جارکش ءَ گوشتگ کہ براس ءِ سرمچاراں بارکان ءَ دگہ یک کارے ءَ پہ زورگریں پاکستانی لشکر ءَ راشن بروکیں یک گاڑی یے دستیگ کرتگ ءُدگہ یک ٹرکے ءَ ھوار چار پرپٹ مانداشتگ اَنت۔
آئی ءَ گوشتگ کہ بلوچ راجی آجوئی سنگر ( براس ) بارکان ءُ کِر ءُ کشانی لیویز کارمنداں تچکی ءَ گوش ایت کہ آ زورگریں پاکستانی لشکرءُ چیریں ادارھانی پرمان ءِ رد ءَ بلوچ راجی آجوئی زرمبشت ءِ دیم ءَ چہ اڑاند ودی کنگ ءَ دور بہ بنت۔ پہ ھندی مردم بوگ ءِ بنیاد ءَ گوں اے لشکر ءَ سرمچارانی نیمگ ءَ رھا کنگ بیت، بلے آ وتی بلوچ کشیں کار ءَ یل نہ کن اَنت گڑا آیاں زورگریں لشکر ءِ وڑ ءَ تچک ءِ نشانگ کن ایں ءُ وتی جانی ءُ مالی تاوان ءِ زمہ وار وت اَنت۔ ھندی میر ءُ مھتر ءُ اسپیت پوش وتی مردماں اے وڑیں کار کنگ ءَ میل اَنت۔
بلوچ ھان ءَ وتی درشان ءِ گڈی ءَ گوشتگ کہ براس ھمے کول ءَ کنت چہ بلوچ سرڈگار ءَ بلوچ دژمنءِ داں سرجم ءَ در آھگ ءَ مئے ارش برجاہ بنت۔
