بلوچ راجی آجوئی سنگر ( براس ) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ که براس ءِ سرمچاراں نوشکے ءِ بارکان ( چمالنگ) ءِ اُرشاں زورگریں پاکستانی لشکر ءِ 22 کارمند کشتگ، اُرشاں سرمچار زورگریں لشکر ءِ مزنیں بنجل ءِ دسیتگ کنگ ءَ سوبین بیتگ اَنت ءُ ھمے وڑ ءَ دژمنیں لشکر پدکنز بوگ ءَ لاچار بیتگ. گوں دژمنیں لشکر ءَ میڑاں براس ءِ سرجم ءَ پنچ سرمچار شھید بیتگ.
آئی ءَ گوشتگ که دوشمبے ء شپ ءَ نوشکے ءِ ھند گلنگور ءَ براس ءِ سرمچاراں زورگریں پاکستانی لشکر ءِ مزنیں بنجل اُرشے ءَ نشانگ کرتگ. سرمچاراں اسنائپر اُرش ءَ بنجل ءِ پھازداریں چوکیانی کارمندانی کشگ ءَ ھوار ترندیں اُرشے بندات کرتگ. نو ءُ نیم ءَ بندات بیتگیں اُرش داں ادار یک ءَ برجاه بیتگ، سرمچار بنجل ءِ یک بھرے ءِ سرجم ءَ دستیگ کنگ ءَ سوبمند بیتگ اَنت.
جارکش ءَ گوشتگ که ھمے میان ءَ آدگه ٹولیاں لیویز ءُ کسٹم ءِ چوکی ھم گپتگ اَنت ءُ کارمند دزگیر کرتگ اَنت.، ھمے ھند ءَ په دژمنیں لشکر ءِ کمک ءَ سر بیتگیں گاڑیانی کاروان سرمچارانی سنگر گپتگیں ٹولی ءَ ترندیں اُرشے ءَ نشانگ کرتگ، چه ایشی ءَ دژمن ءِ یک گاڑی یے سرجم ءَ تباه بیتگ ءُ دگه سے گاڑی اُرش ءِ زد ءَ اتکگ اَنت. چه ایشی ءَ پد سرمچاراں لیویز ءُ کسٹم ءِ کارمند یل کرتگ اَنت.
آئی ءَ گوشتگ که اُرشاں زورگریں پاکستانی لشکر ء سرجم ءَ 17 کارمند مرتگ ءُ سک باز ٹپی بیتگ. ھمے وڑ ءَ سرمچاراں دژمنیں لشکر ءِ سلاه ءُ گولا گوں وت برتگ اَنت. مزنیں بنجل ءِ گرگ ءِ میان ءَ براس ءِ دو سرمچار سنگت نزر جان ءُ سنگت رئوپ گوں دژمنیں لشکر ءَ میڑ ءَ شھید بیتگ اَنت.
جارکش ءَ گوشتگ که گوستگیں روچاں 9 اپریل ءَ بارکان ءِ ھند چمالنگ ءَ ڈڈر ءَ زورگریں پاکستانی لشکر ءَ ڈرون اُرش ءَ پد براس ءِ سرمچارانی اوتاگے ءِ نیمگ ءَ آھگ ءِ جھد کرتگ. سرمچار ھمے ھند ءَ چه ڈرون بالگردانی آھگ ءَ سرپد بیتگ اَنت ءُ ایمنی سوبانی بنیاد ءَ جتائیں ٹولیانی دروشم ءَ چه اِے ھند ءَ درکپتگ اَنت.
آئی ءَ گوشتگ که دژمنیں لشکر ءِ دومی ڈرون اُرش ءَ سنگت کبیر شھید بیتگ، ھمے وڑ ءَ ھمے نزیک ءَ سیمی ڈرون اُرش ءَ سنگت چراگ شھید ءُ سنگت دُرّا ٹپی بیتگ. ھمے میان ءَ چه دژمنیں لشکر ءِ بالگردانی کمانڈو ایر کپتگ اَنت ءُ دیم ءَ آھگ ءِ جھد اِش کرتگ که سنگت دُرّا ءَ گوں ٹپی ئیں جاوراں دژمنیں لشکر ءِ گون ءَ جنگ داتگ ءُ کم چه کم پنچ کارمند کشتگ ءُ سک باز ٹپی کرتگ، گوں تیرانی ھلاس بوگ ءَ گڈی تیر ءِ لیکہ ءِ سر ءَ کار کرتگ ءُ گوں وتی تیر ءَ شھید بیتگ.
جارکش ءَ گوشتگ که بلوچ راجی آجوئی سنگر ( براس ) ءِ شھید بیتگیں سرمچاراں میران پنام ءِ نزر ، یاسین پنام رئوپ ، آکل ھاشمی پنام چراگ ، گلام رزا پنام کبیر ءُ مھسن پنام دُرا ھوار اَنت.
آئی ءَ گوشتگ که نوشکے ، گلنگور ءَ شھید بیتگیں سنگت میران پنام ءِ نزر جان ء استاد سید ڈانڈل دل ءِ سر، شاپک ءِ جاه منند اِنت. آ بلوچستان زانشجاه ءَ پزکس ڈیپارٹمنٹ ءِ پنچمی تبک ءِ نودربرے بیتگ. آ چه بی ایل اے ءِ گل ءَ گوں براس ءَ بندوک بیتگ. آئی ءَ 2020 ءَ راجی ایردستی ءِ بگیری ءَ سلاه بندیں جھد بندات کرتگ ءُ شھری چیرجنگی ءَ وتی کرد پیلو کرتگ اَنت. چه ایشی ءَ پیش 2018 ءَ زورگریں پاکستانی لشکر ءِ دست ءَ زوربیگواه کنگ بیتگ که داں بازیں روچاں دژمن ء آزارجاھاں آئی ءَ آزار دیگ بیتگ. آئی ءِ یک براتے کمال جان پنام گلاب ھم راجی آجوئی جھد ءَ پروری 2022 ءَ دژمنیں لشکر ءِ ڈرون اُرشے ءَ شھید بیتگ.
جارکش ءَ گوشتگ که شھید سنگت میران پنام نزر جان 2022 ءَ کوہ ءَ اتکگ ، آئی ءَ شور پارود ، نوشکے ءُ ھاران ءِ سنگراں وتی کرد پیلو کرتگ ءُ گوں وتی جنگی رپک ءُ دیمونی ءَ کسانیں وھدے ءَ اوتاگ ءِ کمان گچین کنگ بیتگ. آئی ءَ دژمنیں لشکر ءِ بگیری ءَ بازیں کاروائیاں گوں سوبمندی ءَ مزنیں کرد پیلو کرتگ اَنت.
آئی ءَ گوشتگ که نوشکے ، گلنگور ءَ شھید بیتگیں دومی سنگت شھید یاسین پنام ءِ رئوپ ء رھیم بکش نوشکے ء ھند کیشنگی ءِ جاه منند اِنت ، آ 2022 ءَ په راجی ایردستی ءِ بگیری ءِ جھد ءَ گوں بی ایل اے ءَ بندوک بیتگ ، آئی ءَ داں یک سالے ءَ شھری چیرجنگی ءِ دروشم ءَ نوشکے ءُ کش ءُ کراں دژمنیں لشکر ءَ را تاوان داتگ، چه ایشی ءَ پد 2023 ءَ پہ جنگ ءَ کوہ ءَ اتکگ، آئی ءَ نوشکے ، شور پارود ءُ ھاران ءِ سنگراں گوں جنگی رپکاں دژمن ءَ تاوان داتگ.
جارکش گوشتگ که سنگت یاسین جنگی رپکانی بنیاد ءَ گشتی کمان گچین کنگ بیتگ ، آئی ءَ وتی ھمک شپ ءُ روچ په دژمن ءِ تاوان دیگ ءَ بکشاتگ.
آئی ءَ گوشتگ که چمالنگ ءَ شھید بیتگیں سنگت آکل ھاشمی چراگ پنام پروپیسر ء ھاشم کیچ ءِ ھند شھرک ءِ جاه منند اِنت. آ 2020 ءَ گوں بی ایل اے ءَ بندوک بیتگ ءُ راجی ایردستی ءِ بگیری ءَ جنگ ءَ ھوار بیتگ، چه ایشی ءَ پیش گوں بی ایس او ءَ بندوک بیتگ ءُ بلوچ ورناھانی راجی آجوئی ءِ بابت ءَ پگری سرپدی دیگ ءِ کار ءَ بیتگ.
جارکش ءَ گوشتگ که بولان، بارکان، چمالنگ ءُ کوه سلیمان ءِ سنگراں کرد ءَ پیلو کنوکیں سنگت آکل پنام ء چراگ انٹرنشنل اسلامک زانشجاه اسلام آباد ءِ پولیٹیکل سائنس ءَ ایم پل کرتگ.
آئی ءَ گوشتگ که شھید سنگت آکل پنام پروپیسر ءَ بی ایل اے ءِ پتھ اسکواڈ ءِ کمانی ءَ وتی کرد پیلو کرتگ، آ نه اِیوک ءَ جوانیں چیرجنگی جنگولیں بیتگ بلکیں سرمچاراں چه آئی ءِ سسائی لیکھاں ھم نپ زرتگ.
جارکش ءَ گوشتگ که چمالنگ ءَ شھید بیتگیں دومی سنگت گلام رزا پنام کبیر ء الی گل ھاران ءِ ھند راسکوه ، ھولگنی تنک ء جاه منند اِنت. راسکوه ءِ دامن ءَ رستگیں گلام رزا 2022 ءَ گوں بی ایل ایپ ءَ بندوک بیتگ ءُ شھری چیرجنگی ءِ دروشم ءَ راجی ایردستی ءِ بگیری ءَ جنگ ءَ بیتگ ءُ چه سالے ءَ پد بارکان ءِ سنگراں اتکگ.
آئی ءَ گوشتگ که سنگت گلام رزا چه راجی آجوئی سرپدی ءَ اَبید یک جھدکار ءُ مھروانیں سنگتے بیتگ ، آئی ءِ بارکان ءِ سنگراں بازیں جنگاں دژمن ءَ را تاوان داتگ .
جارکش ءَ گوشتگ که چمالنگ ءَ شھید بیتگیں سیمی سنگت مھسن پنام دُرا ء میار تربت ء ھند گلشن آباد ءِ جاه منند اِنت. آ 2023 ءَ گوں بی ایل اے ءَ بندوک بیتگ ءُ شھری چیرجنگی ءِ دروشم ءَ وتی کرد پیلو کرتگ. داں یک سالے ءَ تربت ءِ شھر ءُ کش ءُ کراں دژمنیں لشکر ءِ تاوان دیگ ءَ پد آ 2024 ءَ کوھی سنگراں اتکگ.
آئی ءَ گوشتگ که سنگت مھسن ءَ بارکان ءِ سنگراں راجی ایردستی ءِ بگیری ءَ کرد پیلو کرتگ. آ سکیں گرانیں جاوراں پیسله کنوکے بیتگ آئی ءَ دژمن ءِ دست ءَ دزگیر بوگ ءِ جاه ءَ گوں وتی تیر ءَ وتی کوش ءِ گچین کنگ ءَ اِے گپ پدر کرتگ.
بلوچ ھان ءَ درشان ءِ گڈی ءَ گوشتگ که بلوچ راجی آجوئی سنگر ءِ سرمچارانی دیمونی ءُ اُرش بلوچ راجی آجوئی ءِ تچکیں کلوه اِنت. سرمچاراں نه اِیوک ءَ دژمنیں لشکر ءِ بگیری ءَ وتی دلیری پیش داشتگ بلکیں ھمے گپ پدر کرتگ که بلوچ راج چه وتی آجوئی ءِ جھد ءَ پشت ءَ نه کنز ایت.
