بلوچ یکجھتی کمیٹی ءِ سروک ڈاکٹر ماہ رنگ ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچ چکچینی سکا ترند اِنت ءُ ریاستی زوراکیانی بگیری ءَ اے وھد ءَ سرجمیں بلوچستان ءَ زھرشانی اِنت۔ تیوک ءَ ھمے سال ءِ بندات ءَ دو ماھانی میان ءَ دو سد ءِ کچ ءَ بلوچ زور بیگواہ کنگ بیتگ ءُ درزنانی کچ ءَ بلوچ درکانودی کشگ بیتگ اَنت۔ تیوک ءَ پہ ھمے دو ماھانی زوریں بیگواھی ءُ درکانودی کوشانی بگیری ءَ بلوچستان ءَ سدانی کچ ءَروانک کشگ ءُ زھرشانی کنگ بیتگ۔
آئی ءَ گوشتگ کہ بلوچستان ءَ اے وھد ءَ چار جاہ ءَ زور بیگواھیں مردمانی کھول زھرشانی ءَ نشتگ اَنت۔ بلوچستان ءِ مزنیں شھدگ سرجم ءَ بند اَنت ءُ سرجمیں بلوچستان ءَ زھرشانی کنگ بوگ ءَاِنت۔ ھمک دگ، ھمک ھند، ھمک میتگ ءَچہ ریاستی زوراکیاں سانمندیں مردم زھرشانی کنگ ءُ نندانکانی دروشم ءَ نشتگ اَنت۔
ڈآکٹر ماہ رنگ ءَ گوشتگ کہ اے وھد ءَ راستی ءَ ریاست ءُ ریاستی نزام سرجم ءَ بے سوب بیتگ اَنت۔ تیوک ءَ گوستگیں دو ماهاں چہ ریاستی زوراکیاں سانمندیں مردم درزنانی کچ ءَ دگانی سر ءَ درکپتگ اَنت. چه ایشی ءَ بلوچستان ءِ درسیں شھدگ سرجم ءَ بند اَنت ءُ ھمے وڑ ءَ بلوچستان ءِ زمینی راہ ءَ آدگہ دمگ چہ ریاستی نزام ءَ بیزاری ءَ گندگ بوگ ءَ اَنت۔ چہ ریاستی زوراکیاں سانمندیں کھول چہ دگانی بند بوگ ءِ سوب ءَ مردمانی جنجال ءَ سرپد بنت۔ بلے آیاں آمیدگس، راھبند ءُ پریس کلباں ھوار درسیں وڑاں وتی جھد چکاس اتگ۔ ھمک جاہ ءَ بے اوستی ءُ گیشتریں زوراکیاں ابید دگہ ھچ نہ رستگ۔ نوں ایشانی کِر ءَ بس ھمے یکیں راہ پشت کپتگ کہ اے زوراکیں نزام ءِ بگیری ءَ ریاستی نزام ءَ بند بہ کن اَنت۔
آئی ءَ گوشتگ کہ چہ ریاستی زوراکیاں سانمند بیتگیں کھولاں اِے شوک نه اِنت کہ اے ترندیں سارتی ءُ ھوراں وتی گساں یل بہ کن اَنت ءُ دگانی سر ءَ به نند اَنت بلکیں ریاستی زوراکی ءَ آ لاچار کرتگ اَنت ۔ چہ ریاستی ادارھانی زوراکیاں سانمند بیتگیں کھولاں بھتام جنگ ءَ ابید ھمک مردم گوں آیاں اے جھد ءِ پڑا ھمگام بہ بیت۔
ڈاکٹر ماہ رنگءَ گوشتگ کہ بلوچستانءَ لس مردمانی گھگیری ترند بیتگ ءُ مردم ریاستی گنتریں زوراکیانی بگیری ءَ شال، ھب چوکی ءُ سوراب ءَ داں تربت ءَ یکشل ءَ زھرشانی کنگ ءَ اَنت۔ بلے چہ وتی زوراکیانی کم کنگ ءُ بلوچ چکچینی ءِھلاس کنگ ءَ ابید ریاست نزوریں لس مردماں گیشتر بیھار دیگ ءَ اِنت۔ زھرشانی کنوکیں مردماں سکا بیھار دیگ ءُ آیاں ترسینگ ءَ اَنت۔
آئی ءَ گوشتگ کہ ریاست اے گپ ءَ نہ زانت کہ بلوچ نوں چہ ریاستی زوراکیاں سرجم ءَ دلسیاہ بیتگ اَنت ءُ یکشل ءَ چہ زوراکیانی اوپار کنگ ءَ اچ مردمانی دل ءَ ترس ھلاس بیتگ۔ نوں پہ بیھار ءُ ترسینگ ءَ بے توار کنگ نہ بنت بلکیں بیھار ءُ ترسینگ مردماں گیشتر گھگیری کنگ پرمائیت۔ نوں مردماں چہ ریاستی زوراکیانی دیم ءَ سرجھل کنگءَ ابید وتی رنج توانے جوڑ کرتگ۔
ڈاکٹر ماہ رنگ ءَ گوشتگ کہ ریاست چہ مردمانی ترسینگ ءَ ابید بلوچ چکچینی ءَ بند بہ کنت۔
