شال: وی بی ایم پی ءِ سرکماش نسر اللہ ماں رسانکدر ءَ وتی درشانے ءَ گوشتگ کہ زوربیگواھیں ساجد شاھوانی ءِ بیگواھی ءِ کیس آئی پِت گلام رسول شاھوانی ءَ گل ءِ کر ءَ یاداشت کرتگ۔
نسراللہ ءَ گوشتگ کہ گلام رسول شاھوانی ءِ گوشگ انت کہ آئی زھگ نودربرے اِنت۔ آئی ءَ گوں ھچ وڑیں چست ءُ ایراں کار نہ بوتگ۔ 20 اگست 2024 ءَ سی ٹی ڈی ءُ لشکر ءِ کارمنداں شال کلی گوگڑائی کیچی بیگ سریاب ءَ آئی گس ءَ بیڑ برتگ ءُ آوار جتگ ءُ بیگواہ کرتگ ھما اِنت کہ آئی بابت ءَ مارا ھچ وڑیں سرپدی دیگ ءَ نہ اَنت۔ ھمے سوب ءَ مئے کھول سکا جنجال اِنت۔
نسر اللہ بلوچ ءَ گوشتگ کہ چہ گل ءِ نیمگ ءَ گلام رسول شاھوانی ءَ دلجمی داتگ کہ آئی زھگ ساجد شاھوانی ءِ کیس ءَ سرکار ءُ پہ زوربیگواھیں مردماں جوڑ کنگ بوتگیں کمیشن ءَ سر کنگ بیت ءُ پہ آئی آجوئی ءَ توار چست کن ایں۔
نسراللہ بلوچ ءَ چہ سرکار ءَ لوٹ کرتگ کہ اگاں ساجد شاھوانی ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔ اگاں بے میار اِنت زوت آجو کنگ بہ بیت ءُ آئی کھول ءَ چہ اے جنجالاں در کنگ بہ بیت۔
