بلوچ وومن پورم ءِ سروک ڈاکٹر شلی ءَ ماں چاگردی رسانکدر ایکس ءَ وتی شنگ کرتگیں درشانے ءَ گوشتگ کہ من بلوچستان ءَ برجاھیں چکچینی ءِ تیز بوگ ءِ سر ءَ سکا درد ءُ رنجیگ آں کہ اود ءَ بے میاریں ورنا ھندی کشندہ ٹولی ءِ رد ءَ ناھک ءَ نشانگ بوگ ءَ اَنت۔ بلوچ شھریانی تیوک ءَ وانندگیں ورنایانی کوش ءِ تیز بوگ بلوچستان ءَ ریاست ءِ برجاھیں زوراکیانی پدریں منانک اِنت۔
آئی ءَ گوشتگ کہ لھتیں روچ پیش مھراج بلوچ کشندہ ٹولی ءَ نشانگ کرتگ ءُ مرچی آئی سیاد کریم بکش منزور کہ یک جوانیں بلوچی شائر ءُ باسمائیں ورنایے اَت کیچ ءِ ھند کوھاڈ تمپءَ ھندی کشندہ ٹولی ءِ دست ءَ کشگ بیتگ۔ چہ اے وڑیں کشت ءُ کوش ءَ ریاست وتی بیم ءَ برجاہ دارگءُ چاگرد ءِ تہ ءَ پرشت ءُ پروش ءِ جھد ءَ کنگ ءَ اِنت۔
ڈاکٹر شلی ءَ گوشتگ کہ جاور ھما جاہ ءَ سر بیتگ اَنت کہ نوں تیوک ءَ ایرجنگ کار نہ دنت۔ پہ اے وڑیں زوراکیانی دارگ ءَ ھواریں جھد درکار اِنت۔ چہ گیشتریں بے تواری ءَ گیشتر لاش سوگات کنگ بیت ایشی نہ من ایں۔
