راھوتداری گلانی ساچ ءُ دیمروئی ءَ بنکی کردے پیلو کنت۔ اے گپ بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ راھوتداری ءِ بنگپ ءِ سر ءَ گل ءِ دو روچی ھیلکاری نیاد ءَ تْران کنان ءَ درائینتگ۔
سرکماش ءَ ھیلکاری مراگش ءِ چن ءُ لانچ کنوک ساڑاتگ اَنت ءُ آیاں دیمتر ءَ ھمے وڑیں دگہ مراگش برجم ءِ دارگ ءِ ھم گْْوشتگ۔
اے مراگش چہ گل ءِ وانگ ءُ زانگی تک ءِ نیمگ ءَ برجم دارگ بیتگ اَت۔ دو روچی نیاد بی این ایم ءِ مستریں کمک سرکماش ڈاکٹر جلال ءِ سوج ءُ دلگوش ءَ بیتگ۔وانگ ءُ زانگی تک ءِ جھگیر ھپیز ءُ بی این ایم ءِ برتانیا تک ءِ کارگشاد کمبر بکشی ءَ جارچینی کرتگ۔ اے مراگش ءَ جرمنی ، برتانیا ، امریکا ، نیدرلینڈز ، مشکے ۔ آواران ھنکین ءُ کیچ ۔ گوادر ھنکین ءِ باسکاں بھر زرتگ۔
اے مراگش ءِ بارہ ءَ گپ جنان ڈاکٹر جلال ءَ گْوشتگ ھیلکاری مراگش ایر کنگ ءِ بنکی مول راھوتداری ءِ ارزشت ، سیتمندی ، راھوت دارگ ءِ وڑ ءُ ڈول ءِ سرپد بیگ ءُ ایشی ءِ چاگرد ، تْرامگیج ( ادارہ ) ءُ مردمانی سر ءَ سانانی بارہ ءَ الکاپی ءَ چمشانک دیگ اَت۔بیتگیں مراگش ءِ تہ ءَ راھوتداری ءِ جتائیں پھناتانی سر ءَ شریں وڑے ءَ گپ بیتگ۔درسیں بنگپاں باسکاں بھر زرتگ ، ءُ گوں وتی کتہ کاری ، سسا ءُ جستانی پارست ءَ اے بھرگانی سیمندی ءُ سرپدی گیش کرتگ۔ چہ ایشی ءَ بھر زیروکاں سیاسی کارانی تہ ءَ داشت ءِ ودی کنگ ءَ راھوتداری ءِ راھبندانی سرپد بیگ ءَ ، وت کنگ ءُ پیش دارگ ءِ دْروشم ءَ موہ رس اتگ۔
گل ءِ کستریں کمک سرکارگشاد حسن دوست ءَ کہ مراگش ءِ میان ءَ چار گزار اَت ، گْوشتگ چہ اے وڑیں مراگشاں سیاسی کارکنانی کارانی تہ ءَ گھتری کیت۔چہ ایشی ءَ گل ، ساچ ءُ دیمروئی ءِ نیمگ ءَ روت۔ اے دو روچی مراگش سکا سوبمند بیتگ۔ایشی ءِ تہ ءَ بھر زیروکاں ناں ایوک ءَ راھوتداری ءِ بنکی راھبند در برتگ اَنت بلکیں چہ مراگش ءِ پارست ءَ بی این ایم ءِ باسکانی تہ ءَ راھوتداری ءِ بارہ ءَ گیشتر سرپدی ءُ بودشت ودی بیتگ کہ سیاسی کارانی تہ ءَ آیانی کمک بہ اَنت۔
