بلوچ لبریشن آرمی ءِ جارکش جیئند ءَ ماں رسانکدر ءَ وتی شنگ کرتگیں درشانے ءَ زھری کاروائی ءِ زمہ واری منّ اِتگ ءُ گوشتگ کہ بی ایل اے ءِ سرمچاراں چارشمبے ءِ روچ ءَ دہ ادار ءَ گیش ھزدار ءِ ھند زھری سرجم ءَ گپتگ ءُ زورگریں لشکر ءِ زور ھلاس کرتگ۔ چہ دہ ادار ءَ پد درسیں بلوچ سرمچار پہ سلامتی وتی مھکمیں بندر ءَ شتگ اَنت۔ اے آپریش ءَ بی ایل اے ءِ دو یونٹ اسپیشل ٹیکٹیکل آپریشن اسکواڈ ( ایس ٹی او ایس ) ءُ پتہ اسکواڈ ءَ بھر زرتگ۔ اے کار ءَ بی ایل اے ءِ انٹیلیجنس بھر زراب ءِ کمک گوں بیتگ۔
آئی ءَ گوشتگ کہ بی ایل اے ءِ سرمچاراں نیمروچ ءِ دوازدہ ءُ نیم ءِ نزیک ءَ زھری شھرءَ آپریشن بندات کرتگ ءُلیویز تانہ، بینک، نادرا کارگس ءُ میونسپل کمیٹی گپتگ اَنت۔
جارکش ءَ گوشتگ کہ ھزدار شھر ءِ 40 کلومیٹر دوری ءَ زھری شھر ءَ سرمچاراں جتائیں جاھاں سنگر گپتگ ءُتر ءُ گرد کرتگ، اے میان ءَ سرمچاراں مسیت ءَ جار جتگءُ مردم یکجاہ کرتگ اَنت ءُتران کرتگ۔
آئی ءَ گوشتگ کہ اے میان ءَ سرمچارا ں پاکستانی لشکر ءِ کارمند پہ سلاھانی چگل دیگءَ لاچار کرتگ اَنت ءُ 23 کلانشنکوپ ءَ ھوار بازیں کچے ءَسلاہ ءُ گولا، سرکاری ریکاڑد، گاڑی ءُ پرپٹ دستیگ کرتگ اَنت ءُ ماڑی مانداشتگ اَنت۔
جارکش ءَ گوشتگ کہ اے میان ءَ شھر ءِ نیمگ ءَ آوکیں پاکستانی لشکر ءِ 35 گاڑیانی کاروان ءِ سر ءَ سنگر گپتگ ءُ سرمچاراں زھری کوچو ءَ گوں چیرکرتگیں شورھاں نشانگ کرتگ ءُ پد ءَ گوں وتکاریں سلاھاں ارش کرتگ۔ ایشی آسر ءَ یک گاڑی یے سرجم ءَ تباہ ءُکم چہ کم چار کارمند مرتگءُ ھپت ٹپی بیتگ۔
آئی ءَ گوشتگ کہ اے میان ءَ بی ایل اے ءِ سرمچاران ءَ لس مردماں شریں وڑے ءَ کمک کرتگ ءُ جتائیں جاھاں بلوچ راج ءَ سرمچار وش اتک کرتگ اَنت۔ اے دہ ادارانی میان ءَ لس مردمانی جان ءُ سامانانی ھیالداری دارگ بیتگ ءُ لس مردم ھچ وڑیں تاوان نہ داتگ۔
جارکش ءَ گوشتگ کہ ھمے وڑ ءَ کلات ءِ ھند پندران سرمچاراں گپتگ ءُ رھوتی شرکت ءِ دو کارمند دستیگ کرتگ کہ آیانی جست ءُ پرس برجاہ اِنت۔
آئی ءَ گوشتگ کہ بلوچستان ءِ تہ ءَ زھری ءَ داں انچوک اداراں سرجم ءَ دست ءَ کنگ زورگر ءِ زور ءِ ھلاس کنگ، بی ایل اے ءِ نوکیں زور ءُ جوانیں کارشونیانی کرد ءَ تچک ءَ پیش دار ایت۔ اے وھد ءِ تچکیں منانکے کہ دژمن چہ تہ ءَ ھلاس اِنت۔ کودکیں شھریانی سر ءَ زور چکاسگ ءَ ابید پہ آئی ءَ دگہ ھچ پشت نہ کپتگ۔ وھدے کہ زورگریں لشکر گوں بی ایل اے ءَ دیم پہ دیم بیت گڑا دژمن ءِ پروش پدر بیت۔ اے پہ سرجمیں راج ءَ تچکیں کلوھے کہ اگاں بلوچ وتی زور ءَ یکجاہ بہ کنت گڑا اے لگوریں زورگریں لشکر ءَ چہ وتی سرڈگار ءَپہ ارزانی ءَ تاچینت کنت۔
جیئند ءَ گوشتگ کہ زھری بی ایل اے ءَ سرجم ءَ گپتگ، آپریشن ھیروپ ءِ تیاریانی دومی بھر بیتگ۔
