بی این ایم شھید انور ایڈوکیٹ کیچ گْوادر ھنکین ءِ نیمگ ءَ شھید ڈاکٹر منان جان ءُ ھمبلانی شھیدی ءِ سالروچ ءِ درگت ءَ دیوانے برجم دارگ بوتگ۔ دیوان ءِ جارچین کیچ گْوادر ءِ ھنکین ءِ کارگشاد جیئند بلوچ بوتگ، دیوان ءَ بی این ایم ءِ بنجاھی رسانکدری کارگشاد کازی داد مھمد ریھان، بی این ایم ءِ بنجاھی مستریں کمک سرکماش ڈاکٹر جلال بلوچ، بی این ایم ءِ پیشگیں بنجاھی پتر ءِ باسک مھمد یوسپ بلوچ ءُ بی این ایم ءِ کلانھیں باسک ماما انور ءَ تران کرتگ۔
آیاں گوشتگ کہ شھید ڈاکٹر منان جان مرچی مئے میان ءَ ساڑی نہ اِنت بلے آئی ءِ کرد مئے رھشونی ءَ کنگ ءَ اِنت۔ شھید ڈاکٹر منان جان سکا کتاب دوستیں مردمے بوتگ ءُ آئی ءَ مدام کتاب گوں بیتگ ءُ وتی ھمبل گیشتر پہ کتاب وانگ ءَ سکین داتگ اَنت۔ منان وت یک شریں نبشتہ کارے ھم بوتگ۔ آئی ءَ گوں ھمک راجدوستاں مردماں رھوت ءُ نزیکی کنگ ءِ جھد کرتگ۔
آیاں گوشتگ کہ شھید منان جان یک سکا مزنیں رھشونے بوتگ، چہ آئی شھیدی ءَ بی این ایم ءِ تہ ءَ یک مزنیں نزوری یے گندگ بوتگ۔ انچوش کہ شھید چئیرمین گلام مھمد ءِ شھیدی ءَ یک نزوری یے مارگ بوتگ گڑا ڈاکٹر منان جان ءِ شھیدی ھمے پیم ءَ بوتگ۔
آیاں گوشتگ کہ اے وھد ءَ ھم بی این ایم ءِ تہ ءَ سکا باز کار بوگ ءَ اِنت ءُ بی این ایم ءِ باسک ءُ بنجاھی اگدہ داراں وتی کار جْوانیں وڑے ءَ برجاہ داشتگ اَنت۔ اے ھما منان جان ءُ شھید گلام مھمد ءِ داتگیں سکین اَنت کہ سنگت ھمایانی سر ءَ کار کنگ ءُ دیم ءَ جنزگ ءَ اَنت۔ اے ھما شھید منان جان ءِ کرد ءِ مزنی ءُ شاھگانی اِنت کہ ما مرچی آئی ءَ یاد کنگ ءَ ایں۔
آیاں گوشتگ کہ شھید منان جان آجوئی جھد ءِ چیدگ اِنت، آئی ءَ جھد ءِ پڑا شپ ءُ روچ نہ چارتگ ھمک وھد ءَ کار ءَ بوتگ۔ ڈاکٹر منان جان داں زند ءِ گڈی دمان ءَ وتی راجی پرز ءِ پیلو کنگ ءَ بوتگ۔
