بلوچ یکجھتی کمیٹی ءِ سروک ڈاکٹر ماہ رنگ ءَ ماں چاگردی رسانکدر ایکس ءَ وتی شنگ کرتگیں درشانے ءَ گوں ھزدار ءِ مردماں لوٹ کرتگ ءُ گوشتگ کہ آ گوستگیں روچ ءَ چہ ھزدار ءَ زور بیگواہ کنگ بیتگیں کسان سالیں انس ءِ کھول ءِ زھرشانی ءَ بھر بزور اَنت۔
ڈاکٹر ماہ رنگ ءَ گوشتگ کہ گوستگیں روچ ءَ انس چنال پاکستانی لشکر ءَ چہ گس ءَ آزار دیگ ءَ پد آوار جتگ ءُ بیگواہ کرتگ۔
آئی ءَ گوں ھزدار ءِ مردماں لوٹ کرتگ کہ انس ءِ کھول ءِ نیمگ ءَ زھرشانی نندانک ءَ ھوار بہ بنت، زور بیگواھی یک کھولے ءِ جیڑہ نہ اِنت درس ھواری ءَ پاد بیا اَنت ءُ جھد بہ کن اَنت۔
ڈاکٹر ماہ رنگ ءَ گوشتگ کہ مارا انسانیت چہ زوراک ءِ پنجگاں رکینگی اِنت کہ پہ زور دارگ بیتگ۔ نوں چہ ریاستی زوراکیاں زھگ ھم پھریز نہ اَنت۔
