واشنگٹن : پہ بلوچ نیشنل موومنٹ ( بی این ایم ) ءِ ماں امریکا ءَ نوکیں تکے ءِ جوڑ کنگ ءَ سئے بنزہ جوڑ کنگ بیتگ، پہ اگدہ داراں زیت گچینکاری بیت۔ اے رد ءَ بی این ایم ءِ راجمان پتر ءِ باسک نبی بکش ءِ پاگواجھی ءَ بیتگیں نیادے ءَ رودرتکی دمگ ، روکپتی دمگ ءُ میانی دمگ ءِ بنزہ جوڑ کنگ بیتگ اَنت۔
نیاد ءَ چہ سجھیں امریکا ءَ بی این ایم ءِ باسک اتکگ اَنت کہ آیانی تہ ءَ میر دوست ءُ سمئی ھم گون اَت اَنت۔
پہ رودرتکی دمگ بنزہ ءَ اسلم کارگشاد ءُ ابدل رھیم کمک کارگشاد، پہ روکپتی دمگ بنزہ ءَ میر دوست ئیسا کارگشاد ءُ انایت کمک کارگشاد ءُ پہ میانی دمگ بنزہ ءَ زپر اکبال کارگشاد ءُ پزل کمک کارگشاد گچین بیتگ اَنت۔
تک ءِ مچ باسکی نیاد دیم ءِ ماہ ءَ بیت کہ آئی ءِ تہ ءَ باسک پہ تک ءِ اگدہ دارانی گچین ءَ بھر زیر اَنت ءُ نوکیں اگدہ دار وتی اگدھانی سوگند ءَ ور اَنت۔
