بلوچستان لبریشن پرنٹ ءِ جارکش میجر گھرام ءَ وتی درشانے ءَ گْوشتگ کہ پانزہ جنوری ءَ زورگریں پاکستانی لشکر ءَ بولان ءِ ھند بارڈی ءَ گوں گاڑی ءُ پیادگیں کارمنداں لشکرکشی بندات کُرتگ۔ روچ ءِ ادار دوازدہ ءَ لشکرکشی کنگ ءَ بیتگیں زورگریں لشکر ءِ کارمند گوں سرمچاراں دیم پہ دیم بیتگ اَنت، چہ ایشی ءَ جنگ بندات بیتگ ءُ داں نیم ادار ءَ جنگ برجاہ بیتگ کہ زورگریں لشکر ءِ کارمند پدکنزگ ءَ لاچار بیتگ اَنت۔
آئی ءَ گْوشتگ کہ روچ ءِ دو ءُ نیم ءَ پد ءَ یکبرے سرمچار گوں لشکر ءَ دیم پہ دیم بیتگ اَنت ءُ داں بیست دمان ءَ جنگ برجاہ بیتگ ءُ لشکری کارمند پدکنزگ ءَ لاچار بیتگ اَنت۔
آئی ءَ گْوشتگ کہ روچ ءِ ادار چار ءَ یکبرے پد ءَ گوں دژمنیں لشکر ءَ میڑے بندات بیتگ کہ چہ ایشی ءَ پاکستانی لشکر پد کِنز بیتگ ءُ چہ دمگ ءَ دراھگ ءَ لاچار بیتگ۔
جارکش ءَ گْوشتگ کہ لشکرکشی ءِ میان ءَ دژمنیں لشکر ءَ ڈرون ءُ سرویلینس کیمرہ ھم کارمرز کُرتگ،سرمچاراں گوں جوانیں کارشونیاں ڈرون کیمرہ ءُ زورگریں لشکر ءِ گاڑی تاوان داتگ اَنت۔
آئی ءَ گْوشتگ کہ ھنچوش گُمان بیت کہ سَے جتائیں جاھاں بیتگیں میڑاں دژمنیں لشکر ءَ جانی ءُ مالی تاوان بیتگ ءُ میڑانی میان ءَ سرمچاراں گوں جوانیں جنگی رپکاں پہ سلامتی وتی ڈواراں سر بیتگ اَنت۔
میجر گھرام ءَ وتی درشان ءِ گُڈی ءَ لشکرکشی ءَ بیتگیں لشکری کارمندانی پدکنز کنگ ءِ زمہ واری منّ اِتگ ءُ گْوشتگ کہ ما پہ وتی سرڈگار ءِ دیمپانی ءَ ھر وڑیں دیمونی دئیں۔
