بلوچ یکجھتی کمیٹی ءِ سروک ءُ زور بیگواھیں ڈاکٹر مھمد ءِ جنک سمی دین ءَ ماں رسانکدر ءَ وتی شنگ کرتگیں درشانے ءَ گوشتگ کہ دہ دسمبر 2024 ءَ پاکستانی لشکر ءَ سے مردم آوار جنگ ءَ پد بیگواہ کرتگ اَت۔ ایشانی بابت ءَ کھول ءَ پریس کانپریس کرتگءُ اتپاک منزور ءُ آئی دو برات ءِ زوریں بیگواھی ءِ بابت ءَ گپ جتگ اَت۔ رند ءَ اتپاک منزور ءِ دوئیں برات یل کنگ بیتگ اَنت، بلے پرندوشی تراکے ءَ اتپاک منزور کشگ بیتگ۔
آئی ءَ گوشتگ کہ ھمے میان ءَ دگہ یک ویلے ءَ ورنا جھانزیب کہ ھوشاپ ءَ زھرشانی ءِ میان ءَ ریاستی ادارھانی کارمندانی گاڑی ءَ ٹکرے جتگ اَت۔ جھانزیب گوں ٹپی ئیں جاوراں نادراھجاہ ءَ برگ بیتگ اَت، آئی دوشی ٹپانی درد نہ سگ اِتگ ءُ بیران بیتگ۔
سمی دین گوشتگ کہ ھمک روچ مردم زور بیگواہ ءُ کشگ بوگ ءَ اَنت اے انسانی ھکانی مزنیں بگیری اِنت۔ گوں انسانی ھکانی ادارھاں لوٹ کناں کہ بلوچستان ءَ بیوکیں درکانودی کوش ءُ زوریں بیگواھیانی بگیری ءَ گامگیج بزور اَنت۔
