بلوچ لبریشن آرمی نا جارکش جیئند بلوچ چاگڑدی رسانکدر ئٹی شنگ کروک اسہ درشان ئسے ٹی پارے کہ قلات ناگاہو ٹی زاغ ئنا ہند آ 28 نومبر 2023 آ قوضہ گیر پاکستانی لشکر نا اسہ ڈرون جلہو ئسے آن پد دشمن مونا بس ۔ دشمن نا ہیلی کاپٹر آک جتا آ جاگہ تے آ کارندہ دڑِفسہ بلوچ لبریشن آرمی نا اسہ کیمپ ئسے پلویڑ ئٹی ہلنگ نا کوشست کرے ۔ ولہ بی ایل اے نا سرمچار آک جتا جتا بشخ مرِسہ دشمن آ جلہو تا بناء ئے کریر ۔
او پارے کہ دشمن ئے مونا بننگ کن وے اِلّنگ نا وخت ، دو پہ دو جھڑپ ئٹی سنگت رفیق ٹپی آ حالیت ئٹی ہم مورچہ ئے سنبھالا۔ اِرا گھنٹہ آن زیات اسکان برجاء غا جھڑپ ئٹی دشمن نا ہفت کارندہ کھسک و کیہیک ٹپی مسُر ، ہندُن بی ایل اے نا اِرا جانباز باسک سنگت نجیب عرف رفیق و سنگت عامر عرف عمر جان سُم تا ایسر مننگ آن پد ایسری سُم ئنا فلسفہ آ عمل کریسہ ایسری سُم تے گچین کریسہ تینا دو تیٹ جامِ شہادت نوش کریر ۔
جارکش پارے کہ شہید سنگت نجیب لہڑی عرف رفیق ولد نورالدین المعروف باباشکاری قلات منگچر نا ہندی ئسے ۔ شہید نجیب تنظیم نا ہرے نا سنگت باباشکاری نا فرزند ءِ ، ہرانا رفاقت ئٹی تینا ورنائی ٹی بلوچ جنز آجوئی ٹی اوار مس ۔ ہندا وخت آ اوفتا خاہوت ئٹی چُنا و زالبول آک ہم شہید مسُر ۔
جارکش پارے کہ شہید نجیب 2017 ٹی باقاعدہ تنظیم نا باسک مس و قلات ناگاہو ٹی محاز آ کیہی آپریشن تیٹی بشخ ہلِسہ دشمن ئے نسخان تس ۔
او پارے کہ ایلو سنگت عامر سرپرہ عرف عمر جان ولد نبی بخش شال ئنا ہندی ئس اس ۔ او تدوکا اسہ سال آن بلوچ لبریشن آرمی ٹی اسک۔ ہندا تو ئٹی اودے محاز آ ذمہ واری تِننگا ۔ ہراڑے کہ او مریبت و محنت ئٹ بلوچ آجوئی جنز ئکے خواری کشا ۔
او پارے کہ بلوچ لبریشن آرمی شہید آ سنگت آتے بدلہ ئے ، اوفتا مسخت آجو بلوچستان نا دروشم ئٹ ہلو ۔ بی ایل اے پکا ارادہ کیک کہ اوفتا مسخت نا دوئی کننگ و قوضہ گیر لشکر نا پیشتمنگ اسکان جلہو آک برجاء مرور ۔
