بیگواھیں بلوچ جنک

نبشتہ کار: ازیز سنگھور
رجانکار: بانڑی بلوچ

بلوچستان ءُ کراچی ءِ انوگیں روچاں بوتگیں ویل یک برے پد ءَ ھمے تھلیں راستی ءَ دیم ءَ آرگ ءَ اِنت کہ زوریں بیگواھیانی ھدبندی چہ مرداں دیم ءَ گْوستگ ءُ داں زالبول ءُ نودربریں جنکاں سر بوتگ۔ اے کار بلوچ چاگردی روایتانی ھما سھریں لکیر ءَ کشّگ ءَ اِنت ایشی تہ ءَ زالبول ءُ زھگ ءَ مدام چہ جنگ ءُ جیڑہ ءَ جتا سرپد بوگ ءَ اَنت۔ سے شمبے ءِ شپ ءَ شال ءَ بولان میڈیکل کالج ءِ جنکانی ھاسٹل ءَ بیڑ برگ ءِ ھال ءَ پہ نودربر ءُ آیانی کھولاں ترس ءُ بیمّ ودی کرت۔ ھالانی رد ءَ ھدیجہ بلوچ نامیں یک نودربرے، آ بی ایس نرسنگ ءِ ھپتمی سمسٹر ءِ نودربر اِنت ءُ کیچ ءِ ھند ھیرونک ءِ جاہ منند اِنت، آوار جَنگ ءُ چیریں جاھے ءَ برگ بوتگ۔ اے ویل ءَ پد جنکانی ھاسٹل ءِ بلوچ نودربراں زھرشانی کرتگ ءُ ھمے بھتام جتگ کہ آیاں بلوچ پجّار ءِ بنیاد ءَ ترسینگ ءَ اَنت۔

اے ویل چونیں ھم یک شپ یا یک شھرے ءَ بندوک نہ بوت۔ ھمے روچ ءِ بیگاہ ءَ کراچی ءِ تْیاب دبی ھند ھاکس بے ءِ نزیک ءَ ابدرھمان گوٹ ( بلیجی ) ءَ بلوچ یکجھتی کمیٹی کراچی ءِ آرگنائزر پوزیہ شاشانی ءِ براس داد بلوچ چہ آئی گس ءَ دومی بر ءَ آوار جَنگ ءِ ھال شنگ اِت۔ کھول ءِ رد ءَ پوزیہ بلوچ ءَ ایپ آئی آر ءُ کانودی کاگد لوٹ اِتگ اَنت گڑا آیاں بیھار داتگ ءُ بے وارنٹ ءَ آئی براس برتگ۔

ھمے وڑ ءَ 16 اپریل 2026 ءِ شپ ءَ چہ کراچی ءِ ھند نیول ءَ آواران ءِ جاہ منندیں ھسینہ بلوچ ءِ آوار جنگ ءَ پد بیگواھی ءِ ھال دیم ءَ اتک۔ اے ویل ھمے جست ءَ وی کن اَنت کہ اگاں چونیں ھم مردمے ءِ سر ءَ چونیں ھم بھتامے بہ بیت گڑا کانود ءِ رد ءَ آمیدگسءَ چی ءَ پیش کنگ نہ بیت؟ چی ءَ گڑا اے وڑیں مردم تھاریانی تہ ءَ بیگواہ کنگ بنت ءُ آیانی کھول بے سدکی ءُ ترس آماچ کنگ بنت؟
اے چہ اے دْرچ ءَ پیش ھم باز بر ءَ دیم ءَ اتکگ۔ 8 اپریل ءَ کراچی ءِ ھمد شراپی گوٹ ءَ یک بلوچ زالبولے ءَ ھوار نھ مردم آوار جنگ ءُ بیگواہ کنگ ءِ ھال دیم ءَ اتکگ۔ ھندی مردمانی رد ءَ آ مردمانی تہ ءَ نسیر ءِ لوگبانک شکیلہ، امران ء پیز، ادنان ء پیز، رزوان ء پیز، سابر ء پیز، نسیر ء ھیرمھمد، وسیم ء ھیر مھمد، سلمان ء شریپ ءُ شھزاد ء جامل ھوار اَنت۔ اے ویل ھندی مردمانی تُرس ءُ بے تاھیری ءَ گیش کنت۔

زالبولانی زوریں بیگواھی ءِ اے گپ نوک نہ اِنت۔ 29 مئی 2025 ءَ شپ ءِ سے ءَ چہ سول ھسپتال ءَ بیست ءُ چار سالی ئیں نودربر ماہ جبین بلوچ آوار جَنگ ءُ چیریں بندیگجاھے ءَ برگ بیت۔ ماہ جبین بیسیمگ ءِ جاہ منند اِنت ءُ آ بلوچستان یونیورسٹی ءَ لائبریری سائنس ءِ نودربرے۔ اے ویل ءَ نہ ایوک ءَ وانوک بلکیں انسانی ھکانی کارکن ھم سکا ترس آماچ کرتگ اَنت۔

اے چاگرد ءَ اِزّت، گیرت، گھگیری ءُ اجتمائی ءِ بنیادی ارزشتے ھست۔ اے راھبندانی تہ ءَ دگہ یک گچینیں کارے ایش اِنت کہ چونیں ھم جیڑھے ءَ زھگ ءُ زالبولاں پھریز اَنت۔ ٹکّی جنگ ءُ دُژمنیاں ھم زالبول پھریزگ بنت۔ اے یک انچیں اکلاکی لکیرے کہ اے سرگوز کنگ نہ ایوک ءَ روایتانی لگتمالی اِنت، بلکیں ماپ نہ بیوکیں جُرمے زانگ بیت۔

بلے انوگیں ویل اے روایتاں مان آرگ ءَ نہ اَنت۔ 22 نومبر 2025 ءِ شپ ءَ ھب چوکی ءِ ھند دارو ھوٹل ءَ یک گسے ءَ بیڑ برگ ءِ میان ءَ 15 سالیگیں نسرین ء دلاور آوار جنگ ءُ بیگواہ کنگ بوتگ۔ یک کسانسالیں جنکے ءِ اے وڑ ءَ دزگیری یک انچیں جُستے ودی کنت کہ ایشی پسو کانود ءِ دلیلانی تہ ءَ دیگ نہ بیت۔ جُست ھمے ودی بیت کہ ریاست چہ وتی شھریانی زھگاں تُرس اِیت؟

ھمے وڑ ءَ 20 دسمبر 2025 ءَ سھب ءَ مھلہ ھب چوکی ءِ ھند گنجی گوٹ ءَ یک گسے ءَ بیڑ برگ ءِ وھد ءَ یکیں کھول ءِ دو زالبول ھیرالنسا واھد ءُ ھانی بلوچ آوار جنگ ءُ بیگواہ کنگ بنت۔ رند ءَ چہ مھلوک ءِ زور دیگ ءَ ھانی بلوچ یل کنگ بیت، بلے ھیرالنسا ء واھد انگت بیگواہ اِنت۔ ھانی بلوچ یک گسی زالبولے اَت ءُ آئی دو کسانیں زھگ اَنت۔ آئی مستریں جنک ءِ اُمر بس پنچ سال اِنت۔ اے ویل ءَ اے کھول ءِ ترس ءُ بے پھریزی ءِ مارشت گیش کرتگ۔

چہ کراچی ءِ ھند لیاری ءَ ھم انچیں ویلے رپورٹ بوتگ۔ 28 پروری ءِ سھب ءَ الی مھمد میتگ، کلری ءَ یک نودربرے آئشہ ء لال جان ءُ دگہ یک ورنایے داؤد ء ابراھیم آوار جَنگ ءُ بیگواہ کنگ ءِ ھال دیم ءَ اتکگ۔ دوئیں مکُران ءِ جاہ منند اَنت اے وھد ءَ گوں وتی کھول ءَ کراچی ءَ نشتگ اَنت۔

زالبولانی زوریں بیگواھی یک چاگردی تباھی یے بوگ ءَ اِنت۔ وھدے کہ یک ماس یا جنکے شپ ءِ تھاری ءَ چہ گس یا ھاسٹل ءَ آوار جَنگ بیت گڑا آئی سان ایوک ءَ آ مردم ءِ سر ءَ نہ کپ اَنت بلکیں سرجمیں کھول ءُ چاگرد ءِ سر ءَ کپ اَنت۔ زھگ پہ وتی ماسانی ودار ءَ دروازگانی دپ ءَ چماں سک کن اَنت ءُ نند اَنت، بلکیں ھک آہ ءَ چیھانٹ ودی بیت۔

ھسینہ، ھدیجہ، ماہ جبین، نسرین ءُ آدگہ زالبولانی ویل ءَ یک برے پد ءَ ھمے جُست ودی کرت کہ داں کدی شپ ءِ تھاریاں اے وڑیں ویل بوان کنت؟ داں کدی کھول پہ وتی آزیزانی ودار ءَ چماں بہ دروازگ ءَ سک بہ کن اَنت؟ ءُ داں کدی کانود ءِ واکداری اے سرڈگار ءِ سر ءَ وتی ساڑی بوگ ءِ مارشت ءَ دنت؟