نبشتہ کار: ڈاکٹر شلی بلوچ
رجانک: سرباز وپا
زالبولانی میان استمانی روچ تھنا یک روچے ءِ چیدگی یاتگار نہ اِنت، بلکیں اے سرجمیں جھان ءِ زالبولانی جھد، دیمونی ءُ چاگردی کرد ءِ منّگ ءِ روچ اِنت۔ اے درگت ءَ بلوچ زالبولانی کرد ءِ سر ءَ گپ جنگ پمیشکا شر اِنت، چی ءَ کہ بلوچ گْوستانک ءَ زالبولانی توکل، زانشت، وپاداری ءُ گھگیری ءِ چیدگ بوتگ اَنت۔
بلوچ گْوستانک ءُ ربیتانی سر ءَ چمشانک دیگ بہ بیت گڑا تچک بیت کہ زالبولاں مدام چاگردی واک، گیرت، دودمانی پچّار ءُ پہ مُچّی واک ءِ پھریزگ ءَ بنکی کرد پیلو کرتگ۔ بلوچ لوک داستان ءُ گْوستانکی ربیتانی تہ ءَ مارا اے وڑیں بازیں درور دز کپ اِیت کہ اُود ءَ زالبولاں نہ تھنا زانشت ءُ وپاداری پیش داشتگ، بلکیں گرانیں جاورانی تہ ءَ وتی چاگردی توکل ءُ شیرزالی ءِ مسال زندگ داشتگ۔
بلوچ ربیتانی تہ ءَ ھانی وڑیں مردم وپاداری، زانشت ءُ سابت کدمی (خود داری) ءِ چیدگ ءِ ھساب ءَ یات کنگ بنت۔ بی بی بانڑی ءِ توکل ءُ راجی گیرت یک تچکیں منّانکے ءِ ھساب ءَ درشان کنگ بیت۔
اے گْوستانکی ربیت ھمے راستی ءَ پیش دار اِیت کہ بلوچ چاگرد ءَ زالبولانی کرد تھنا گوں یک گسی زالبولے ءَ بندوک نہ بوتگ، بلکیں آ چاگردی زانشت، اکلاکی سروکی ءُ مُچّی زمہ واریانی یک جوانیں پدیانکے۔ ھمے سَوب اِنت کہ بلوچ چاگرد ءِ مھکمی ءُ دودمانی پدریچ ءَ زالبولانی کرد مدام مزنیں بستارے دار اِیت۔
مرچی بیست ءُ یکمی کرن ءَ وھدے بلوچستان جتائیں چاگردی، سیاسی ءُ انسانی جنجالانی تہ ءَ گْوزگ ءَ اِنت، بلوچ زالبول یک برے پد ءَ گْوستانکی ربیتاں دیم ءَ برگ ءَ اَنت ءُ یک جوان ءُ زانشتی کردے پیلو کنگ ءَ اَنت۔ آ نہ تھنا وتی کھول ءُ چاگردی بنیاد ءَ مھکم کنگ ءَ اَنت، بلکیں انسانی شرپ، چاگردی انساپ، زانشت ءُ پہ بنکی ھکاں گوں ترندی ءَ توار چست کنگ ءَ اَنت۔
انوگیں جاوراں بلوچ زالبولانی مھکمی ھمے گپ ءَ پیش دار اِیت کہ یک باسما ءُ انساپ ءَ چاگردے ءِ جوڑ کنگ ءَ زالبولانی ھواری درکار۔ ھمے مارشت ءِ رد ءَ بلوچ وومن پورم یک انچیں راھبندے دیم ءَ اتکگ کہ بلوچ زالبولانی باسمائی، اتھاد ءُ مُچّی جھد ءِ جھگیری ءَ کنت۔
بلوچ وومن پورم گوں ھمے سدکی ءَ کار کنگ ءَ اِنت کہ زالبول تھنا سانمندیں جُتکے (فریقے) نہ، بلکیں چاگردی مٹی ءَ یک مھکمیں توانے۔ مرچی بلوچ زالبول اوست، گھگیری ءُ مُچّی زمہ واری ءِ چیدگ ءِ ھساب ءَ دیم ءَ پیداک اَنت۔ آ نہ تھنا بنکی ھک ءُ پہ انسانی شرپ ءَ توار چست کنگ ءَ اَنت، بلکیں پہ آیوکیں پدریچ ءَ یک شرپ، باسما ءُ وشیں بانداتے ءِ بنیاد ءَ ایر کنگ ءَ اَنت۔
راستی ھمیش اِنت کہ بلوچ زالبول انوگیں جھد ءَ بلوچ گْوستانک ءِ ھما دْرچ ءِ بھر اَنت کہ چہ ایشی ءَ زالبول مدام وتی چاگرد ءِ گون ءَ اُوشتاتگ اَنت۔ مرچی بلوچ زالبول ھما ربیتانی وارس اَنت کہ شرپ، زانشت ءُ زمہ واری ءِ گون ءَ وتی چاگرد ءِ گھتری ءَ کرد پیلو کنگ ءَ اَنت۔
زالبولانی میان استمانی روچ ءِ درگت ءَ ما ھمے کول ءَ کن اِیں کہ بلوچ زالبول ءِ توار، شرپ ءُ پہ ھکّاں جھد برجاہ بیت۔ چی ءَ کہ یک انساپ، پر ایمن ءُ دیمروئی کنوکیں چاگردے ھما وھد ءَ بوت کنت وھدے کہ زالبول ءَ برابری، شرپ ءُ سروکی کنگ ءِ شریں موھے دیگ بہ بیت۔
