نبشتہ کار: نسراللّہ بُگٹی بلوچ
راج ءِ بانُک ءُ واجھیں وانِندھاں دْروت ءُ دْراھی،انچوش کہ ما سپرید ایں کہ مرچیگیں نودربر ءُ وانِندہ باندات ءِ زانتکار، راھشون، ڈاکٹر ءُ انجینئر اَنت کہ ھمے تبک ءِ بلوچ زِند ءِ ھر پِڑ ءَ راج ءِ ھزمتکار ءُ راج ءِ دیمروئی ءِ واستا بلاھیں کِردے دار اَنت۔ بلے چہ اِے دْراھیں چیزاں ھوار ایشاں راجی زُبان، راجی ھستی ءُ پجّار ءِ ھم پھریزگی زمہ واری ھست اِنت۔
اگاں ما بنگالی راج ءِ پہ زبان ءِ پھریشی ءَ 1952 ءِ بھاشہ آندولن ءَ چمشانک بہ دے ایں گُڑا ما سرپد بَہ ایں کہ مئے بلوچ راج ءِ نودربر ءُ وانِندھانی زمہ واری چے اِنت؟ گِند ئے چہ بنگالی وانِنداھانی جُھد ءُ کُربانی ءِ وانگ ءَ مارا ھم یک درسے رس ایت کہ ما ھم پہ وتی راجی زُبان ءِ واستا چیزے کُت کَن ایں۔
بزانکہ مرچیگیں موبائل ءُ سوشل میڈیا پتراں بلوچ راج ءَ پہ وتی راجی زُبان ءِ سر ءَ کار کنگ لوٹ ایت، راج ءِ ناسرپدیں مھلوک ءَ سرپدی دیگ لوٹ ایت کہ موبائل یک کتابے ءُ دنیا ءِ ھر راج موبائلاں پہ وتی زُبان ءِ دیمروئی ءِ واستا کارمرز کنگ ءَ اَنت۔ ھما راجاں کہ آئی ءِ زُبان ماں وانگجاھاں وانینگ نہ بیت گُڑا آ راج پیسبُک ءُ وٹس ایپ ءِ وڑیں آسراتیاں پہ زُبان ءَ کارمرز کنگ ءَ اَنت۔
مارا ھم راج ءِ تہ ءَ آگاھی آرگ لوٹ ایت کہ ما ھرکَس وٹس ایپی ءُ پیسبوکی وانگجاھاں ھوار بَہ ایں ءُ بلوچی دَرونتاں وانان ءَ بلوچی دربرگ ءُ راست نبیسگ ءِ جُھد بہ کن ایں۔ پد ءَ پیسبُک ءَ دگہ سوشل میڈیا ءِ پتراں مُدام وتی جِند ءِ زُبان ءَ نبیس ایں کہ راج ءِ پہ ءَ بلوچی وانگ ءُ نبیسگ ءِ رواج ودی بہ بیت۔ چہ اشی ءَ ھوار جھد بہ کن ایں کہ پییسر درونتاں وان ایں کہ بلوچی نبشتہ راست بہ بیت تاکہ چہ مئے راست نبیسگ ءَ بلوچی ءَ پائدگ بہ رس ایت۔ چہ مئے راستیں نشتھانی وانگ ءَ وانوک چیزے دربر اَنت۔ اگاں بلوچ وانِندہ تھنا یک ھپتگے ءَ بلوچی دَرونت ءُ راجدوستی نبشتانکاں وانان بہ کن اَنت پد ءَ وھد ءِ ھمراھی ءَ ھر کَس وت بلوچی نبشتہ زبر بیت پرچا کہ بلوچی مئے جِند ءِ زبان اِنت ءُ وتی زبان ءِ وانگ ءُ نبیسگ آسان اِنت۔
وتی نمدی ءِ گُڈی بھر ءَ دزبندی یے کن آں کہ ما وتی زُبان ءِ تہ ءَ بے پائدگیں چیڑھاں ھم ودی مہ کن کہ اِے سلیمانی گالوار ءِ بلوچی نہ اِنت۔ رکشانی گالوار ءِ چُتائیں نبشتھے! اد ءَ مکُرانی نبسگ بئیگ ءَ اِنت۔ بازیں سنگت گوش اَنت کہ ”ث، خ، ذ، غ، ف ءُ ق“ ءِ وڑیں آبانی کشگ ءَ سلیمانی گالوار ءِ گال کشگ بیگ ءَ اِنت۔ البت چوشیں ھبر رَد اَنت۔ اے ”غ ءُ خ“ انگریزی ءَ ھم نیست اَنت۔ ھِندی ءُ دگہ بازیں زُبان ءَ ھم نیست اِنت۔ ما ”لوگ، ورگ، ھُدا، واد ءُ چات“ ءِ وڑیں گالاں گوں بن آباں نبیسیں ایں بلے مارا ھک ھست کہ ما آواز ءُ توارینک ءَ سلیمانی گالوار ءِ رِد بہ دار ایں۔ باید اِنت ما اول وت ءَ بلوچ پھم ایں۔ بلوچی ءَ ماں گالواراں بھر ءَ چُنڈ مہ کن ایں۔ راستی ایش اِنت کہ بلوچی نبشتہ ءِ دیمروئی ھر سَئیں گالوارانی دیمروئی اِنت۔ دنیا ءِ ھر زُبان ءِ مردم وتی گالوار ءِ رِد ءَ ٹَوک کن اَنت بلے نبشتہ راھبند راجاں یکیں زُورگی اِنت کہ بن توار ءَ بن آباں نبسّگ بیت۔
ما امیت کن ایں کہ چد ءُ پد راج بلوچی درونتاں وانان ءَ بلوچی ءَ ماں یکیں نبشتہ ءِ زِد ءَ نبیسں ایت۔
شالا بلوچ راج وت ماں وت تپاک، یکمُشت ءُ یکجان بات، بلوچی دیمروئی بہ کنات۔ بلوچی ءُ بلوچستان شات ءُ وشھال بات آمین۔
شُمئے کستر:
نسراللّہ بُگٹی بلوچ
