بلیدہ ءُ ڈیت اسکواڑ

نبشتہ کار: بھادر بلوچ

بلیدہ ءُ کوچگ ءِ تہ ءَ ریاستی کشندہ ٹولی ءِ بدیں کرد ءُ یکشلیں زوراکی، چِل ءُ پنچ (45) لس بلوچ ورناھانی ناھکّیں کوش، بلوچ سوشل ایکٹیوسٹ، سیول سوسائٹی، ملا، سیاسی مردمانی بے ترک ءُ تواری، لس مھلوک ءِ ترس ءُ بیم آماچی، ھمے جاورانی دیمپانی بلیدہ تھاری ءِ کورچاتے۔

بلیدہ ءِ توکا ایوک ءَ چار ماہ ءِ تہ ءَ ریاستی کشندہ ٹولی بزاں ڈیت اسکواڑ ءُ پاکستان ءِ انٹلیجنس ادارہ  آئی ایس آئی ، ایم آئی، ایپ سی ءُ آرمی ءِ داتگیں ٹاسکانی رِد ءَ چِل ءُ پنچ (45) بیگناھیں ورنا پمیشکا شھید کتگ کہ آ بلوچ آجؤئی جھدکارانی برات، ناکوزتک، تروزتک، سیاد ءُ کس بوتگ اَنت یا کہ راجدوست ءُ زمین دوست بوتگ اَنت، ءُ اے دْرچ انگت ءَ یکشل ءَ برجاہ اِنت۔

ھمے کُلیں ورنا کہ ڈیت اسکواڑ ءَ شھید کتگ اَنت اے درس نودربر، وانندہ ءُ اُستاد، بزگر ءُ پوریاگر، دُکاندار، مزدور ءُ سیاسی باسک بوتگ انت، اِشانی تہ ءَ لھتین ورنا تچ ءَ ڈیت اسکواڑ ءَ ٹارگٹ کلنگ آ شھید کتگ اَنت ءُ گیشتریں ورنا چہ توپک ءِ زور ءَ آوارجتگ ءُ گوں وت برتگ اَنت۔ ٹارچر کنگ ءَ پد سک آزار داتگ اَنت، پد ءَ تیر جتگ ءُ کُشتگ اَنت۔ جون جنگل ءُ گیابانانی تہ ءَ دور داتگ اَنت، اے ورناھانی دور داتگیں لاش لھتیں چہ ھپتگاں پد لھتیں چہ ماھاں پد گندگ بوتگ انت کہ گیشتر اِشانی دیم گپّ ءُ ٹور کنگ بوتگ انت، جانانی گوشت رستراں وارتگ اَنت، پد ءَ ھمے کپتگیں جونانی پجّار لھتین ءَ چہ آھانی پجّار کارڑاں، لھتین ءِ چہ آھانی پادانی سواساں، لھتین ءِ چہ آھانی دستانی مُندریکاں ءُ لھتین ءِ چہ آھانی گور ءِ پشکاں چہ بوتگ اَنت۔ جنگل ءُ گیاباناں ھمے بلوچ ورناھانی کپتگیں ژانگولیں جون لھتیں شوانگاں دیستگ انت، لھتین ءِ دست کچکانی دپ ءَ بوتگ انت کہ میتگانی تھ ءِ وتی لوگانی دپ ءَ نشتگیں گد دوچیں زالبولاں دیستگ اَنت۔

بلیدہ ءُ کوچگ ءِ تہ ءَ کُشگ ءُ جَنگ بوتگیں یک شانزدہ سالی ورنایے ملا رھیم جان ء انور چاردہ (14) اگست ءَ ڈیت اسکواڑ ءَ چہ زیردان ءَ وتی دُکان ءِ تہ ءَ روچ رھمانی بیگاہ ءِ وھد ءَ تچک ءَ ٹارگٹ کتگ ءُ کُشتگ۔ دگہ دو ورنا یکے ھکیم ء اَلی مراد کہ ڈیت اسکواڑ ءُ ایپ سی ءِ سوبیدار ایم آئی کارمند ھسن بادشاہ چہ گردانک ءَ جند ءِ دُکان بیست ءُ شش (26) اگست ءِ شپ نُھ (9) بج ءَ آوار جتگ، چہ آوارجَنگ ءِ بیست (20) منٹ ءِ گوزگ ءَ پد کور ءِ تہ ءَ کُشتگ ءُ دور داتگ۔ دومی نِزام ء اَلی چہ گِلی ءَ 11 مارچ ءَ شش ءِ ساھت ھشت ءَ چہ مھیم ء ایوب ءِ دِکان ءَ ڈیت اسکواڑ ءَ آوارجتگ ءُ پد ءَ دومی روچ ءَ کُشتگ ءُ لاش بِٹ ءِ کَور ءِ تہ ءَ دؤر داتگ۔ دگہ یکے ریکو ءِ نشتگیں یوسپ ابدین نامیں ورنایے چہ کڈکی ٹاور ءِ کش ءَ کہ آ ھمود ءَ کڈکی ٹاور ءِ چوکیدار بیت کہ بیست ءُ پنچ (25) ستمبر ءَ ڈیت اسکواڑ روت آئی ءَ آوار جنت آ دگہ نندوکیں مردمانی چماں بند انت،  زر ءُ پوناں دُزّ انت ءُ بر اَنت، یوسپ ابدین ءِ دست گڑیال، پون، زر،نوکیں پرپٹ درساں زور اَنت پد ءَ جند ءَ ئے کُش اَنتءُ دؤر دے انت کہ لاش لھتیں روچ ءَ پد گندگ بیت۔

یک (1) مئی ءَ میناز بازار ءِ تہ بیگاہ ءِ وھدءَ وتی دُکان ءَ نندوکیں ماسٹر ابدالگنی ء پتھے مھمد جاہ منند پروم ھمے وڑ ءَ ڈیت اسکواڑ ءِ ارش ءَ سک زدگ بیت۔ پنچ (5) ستمبر ءَ گلی ءِ نندوکیں مئراج ء شیر مھمد نامیں ورنایے چہ اھمکان دگ ءَ لشکر ءِ اوتاگ ءِ دپ ءَ لشکر ءَ داشتگ چم ءُ دست بستگ انت اوتاگ ءِ تہ ءَ برتگ، پد ءَ ڈیت اسکواڑ ءَ گرّان کتگ گاڑی ءِ تہ ءَ دؤر داتگ ءُ گوں وت برتگ، پد ءَ بیست ءُ سَے (23) ستمبر ءَ آئی ژانگولین جون گوں بِٹ ءِ نندوکیں تلال ء ابدالرشید نامیں ورنایے ءَ ھوار الندور کَور ءَ دست کپتگ کہ آئی یک دستے کچک ءِ دپ ءَ بوتگ ءُ میتگ ءَ گَشتگ لس مردماں دیستگ، پد ءَ آھی پجار کھول ءِ مردماں چہ آئی جیب ءِ پجار کارڈ ءَ چہ کتگ، کشگ بوتگیں ورنا مئراج ءِ یک دگہ براتے سراج ء شیرمھمد سے (3) سال ءَ پیسر کوچگ ءِ تہ ءَ ڈیت اسکواڑ ءِ جند ءِ لوگ ءَ تیر جتگ ءُ بے گناہ کُشتگ۔ مئراج ءِ گوم ءَ شھید کنگ بوتگیں ورنا تلال ءَ لھتیں روچ پیسر بلیدہ ءِ تہ لشکر ءَ چہ جند ءِ لوگ ءَ پہ زورانسری آوار جنت ءُ گوں وت بارت۔

ھمے پیم ءَ گِلی ءِ جاہ منند ءُ پہ زورانسری آوار جتگیں بلوچاں توار چست کنوکیں سیاسی باسک نوید ءَ ڈیت اسکواڑ ءِ کارمند گوں ایپ سی ءِ بدنامیں سوبیدار ءُ ایم آئی اے ءِ کارمند ھسن بادشاہ ءِ ھواری ءَ ھپت (7) دسمبر ءَ سرشپ ءِ وھداں پہ پندل لوٹارینت ءُ جنتری کَور ءِ تہ ءَ تیر جنت ءُ شھید کنت، زر ءُ پوناں گوں وت بر اَنت کہ پد ءَ ھشت (8) دسمبر ءِ سھب ءَ آئی لاش جنتری کَور ءِ تہ ءَ چہ جند ءِ گاڑی ءِ تہ ءَ دست کپ اِیت، زانگ بہ بیت کہ گوستگیں سھب ءَ نوید وت روت نوانو  ءَ کرنل کامران ءِ کرّ ءَ پہ وتی دو نزیکّیں سیادانی آجو کنگ ءِ واستا، بلے پد ءَ بیگاہ ءَ کہ واتر بیت گڑا سرشپ ءِ وھد ءَ نوید ءَ پون ءِ سر ءَ ھال کن اَنت ءُ لوٹارین اَنت ءُ شھید کن اَنت، زانگ بہ بیت کہ نوانو ءِ انوگیں کرنل اھمد نیازی اِنت۔

گلی چیئرمین میتگ ءِ نندوکیں ورنا اِلتاپ ء سید ءَ شش (6) اکتوبر ءَ ڈیت اسکواڑ ءِ کارمند سلو پاریہ کور ءَ تیر جن اَنت ءُ شھید کن اَنت۔ چاردہ (14) اپریل ءَ کور ء پُشت ءَ ڈیت اسکواڑ ءِ کارمند دوست مھمد ءَ چند ءِ باگ ءِ سر ءَ جن اَنت ءُ شھید کن اَنت۔ بیست دو (22) اکتوبر ءَ میناز چوک ءَ یو بی ایل بینک برانچ ءِ سیکورٹی گارڈ ءُ بِٹ بلیدہ ءِ نندوکیں ورنا پِدا اھمد ءَ ڈیت اسکواڑ ءِ کارمند ھمے وھد ءَ شھید کن اَنت کہ آ بینک ءِ تہ ءَ پہ دُزّ ءِ نیمون ءَ کاینت تیرگواری کن اَنت۔ بینک ءِ تہ ءَ نندوکیں شاھجان ء داد جان جاہ منند الندور سک زدگ بیت کہ رند ءَ پہ اِلاج ءَ کراچی ءَ بر اَنت ءُ بینک ءِ تہ ءَ دگہ میناز ءِ نشتگیں کاردارے سکا زدگ بیت۔

بیست (20) اگست ءَ گلی ءِ نندوکیں بزگر بوھر جان ء دلجان وتی ڈگارانی سر ءَ روگ ءَ بیت کہ آئی ءَ لشکر ءُ ڈیت اسکواڑ ءِ گشتی ٹولی گیپت بے جست ءُ پرس ءَ تچک ءَ تیر باران ءُ شھید کنت۔ پد ءَ دگہ یک بیگاھے ءِ وھد ءَ ایپ سی ءِ بدنامیں سوبیدار ءُ انٹلیجنس ءِ کارمند ھسن بادشاہ وتی لشکری کارمند ءُ ڈیت اسکواڑ ءِ ھمراھی ءَ گِلی ءِ تہ ءَ یک لوگے ءِ سر ءَ ارش ءُ تیر بارانی کنت کہ یک مردمے سکا زدگ بیت۔ ایپ سی ءِ ھمے بدکرد ءُ بدنامیں سوبیدار انٹلیجنس ءِ کارمند ھسن بادشاہ ھمک وھد گِلی ءِ تہ ءَ ھمک روچ لس مھلوکے دُکانانی تہ ءَ روت ءُ میتگاں ترّ اِیت ءُ لس مھلوک ءَ بیھار ءُ پادتراپ دنت کہ من شمارا جنان ءُ کُش آں۔

بیست دو (22) جولائی ءَ میناز چوک ءِ سر ءَ گردانک ءِ نندوکیں بزگر دلجان ء ھدابکش ءَ لس مھلوک ءِ دیم ءَ آوار جنت چار روچ ءِ ٹارچر کنگ ءَ پد آئی تیر سُپتگیں جون ءَ سلوئی ڈیم ءِ سر ءَ دؤر دنت کہ دلجان ھمے رو ءَ وتی پرپٹ ءَ میکینک ءِ کِر ءَ جوڑ کنگبءَ بیت۔ سِی (30) ستمبر ءَ میناز چوک ءِ سر ءَ ڈمبک ءِ نشتگیں دگہ سَے بزگریں بلوچ ورنا نیکسال ءِ دلوش، ابدالکدوس ءِ امید ءُ نِزر مھمد ءِ اَرز مھمد کہ کنٹانی ءَ کار ءَ بنت  ڈیت اسکواڑ کئیت سئیں ورناھاں لس مھلوک ءِ دیم ءَ آوار جنت گوں وت بارت، پد ءَ چارمی روچ ءَ آھانی ژانگولیں جوناں سلوئی ڈیم ءِ سر ءَ دؤر دنت کہ پد ءَ ھمے شپ ءَ لشکری ترجمان آئی ایس پی آر میڈیا ءَ ھمے دروگیں ٹاپار ءَ جنت کہ من سئے دھشتگرد بلیدہ ءَ جتگ۔ بیست ءُ پنچ (25) ستمبر  ءَ الندور ءِ نندوکیں ورنا ھاشم ءِ ابدالکادر ءَ ڈیت اسکواڑ ءِ کارمند میناز بازار ءِ تہ ءَ جن اَنت ءُ زدگ کن اَنت کہ شش روچ ءَ پد آ کراچی لیاکت نادْرھجاہ ءَ شھید بیت۔ دوزدہ (12) نومبر ءَ میناز رژن پراوئٹ وانگجاہ ءِ استاد ایاز اکبر ءَ ڈیت اسکواڑ ءِ کارمند ھما وھد ءَ پہ زورانسری آوار جن اَنت کہ آ چہ وانگجاہ ءَ درکئیت وتی لوگ ءِ نیمگ ءَ روگ ءَ بیت کہ لھتیں روچ گوزگ ءَ پد آئی ژانگولیں جون سلوئی ڈیم ءِ کش ءَ دز کپ کہ آئی پجار ءَ آئی جند ءِ کھول ءِ مردم چہ آئی پاد ءِ سواساں کن اَنت۔

بلیدہ ءُ کوچگ ءِ تہ ءَ بلوچ ورناھانی ناھکّیں کوش ءِ درچ چہ ڈیت اسکواڑ ءِ دستاں یکشل ءَ برجاہ اِنت ءُ لس مھلوک چہ ترس ءُ بیمّ ءَ پھک پمشکا بے توار اِنت کہ اگاں ما گپّے بہ جن اِیں یا کہ توار چست بہ کنیں گڑا ما اوں زوت نشانگ کنگ بہ اِیں۔ بلیدہ ءِ نشتگیں نامگپتیں میر ءُ مُتبر، میتگانی مستر وت ءَ ھلک ءِ نمائندگ گْوشوک درس سرکاری داشتگیں کاسگ چٹّ اَنت ءُ بلیدہ بِٹ ءِ لشکر ءِ بنجل ءَ نندوکیں برگیڈئیر ءُ کرنل ءِ ھمک پرمان ءُ گْوشگ ءِ پد ءَ کیمپ ءَ ھازری دے اَنت۔

بلیدہ زامران ءِ تہ ءَ سرکاری داشتگیں ھمے کشندہ ٹولی ءِ مردم دُزّی ءُ دگہ بازیں سِلکاریاں ھوار اَن۔ دوزدہ (12) پروری ءَ الندور ءِ نندوک ءُ کسانسالیں ورنا ھاتم رھیم بکش ءَ ابدوئی بارڈر ءَ لشکر ءِ دیم ءَ پمشکا شھید کن انت کہ آ وتی تیل کشیں گاڑی ءِ تیلانی دیگ ءَ پہ توپک ءِ زور ءَ دیگ ءِ واستا تیار نہ بیت، ھمے وڑ ءُ ڈول ءَ بلیدہ ءُ کوچگ ءِ تہ ءَ ھمک وھد تیل کشوکیں گاڑی پُلگ بوگ ءَ اَنت۔ لس مھلوک ءِ پرپٹ ءُ زر برگ بوگ ءَ اَنت، دُکان لُٹّ ءُ پُل بوگ ءَ اَنت۔ لس مھلوک دگانی سر ءَ بے اِزت کنگ بوگ ءَ اَنت، مگرب ءَ چہ پد لس مھلوک چہ لشکر ءُ ڈیت اسکواڑ ءِ ترس ءَ چہ لوگاں در نئیت ءُ پد ءَ لشکر ءَ بلیدہ ءِ سرجمیں ڈگار والا بزگر بیھار ءُ پادتراپ داتگ انت کہ مگرب ءَ چہ پد اگاں ھرکس وتی ڈگارانی نیمگ ءَ شُت گڑا آ کُشگ بیت وتی تاوان ءِ زمہ وار

وت اِنت۔

زانگ بہ بیت کہ لس بلوچ ورناھانی بند نہ بیوکیں کشگ ءِ درچ ءَ چہ پیسر  انٹلیجنس ءُ لشکر ءِ ھندی سروگاں یک چیر ءُ اندرین میٹینگے برجم داشتگ کہ اے میٹینگ ءِ تہ ءَ تلشکر ءُ انٹلیجنس ءَ وتی سیاسی مکبر ءُ دلار لوٹارینتگ انت، اے میٹینگ ءِ تہ ءَ نوکیں پالیسی گوں تپاکی ءَ ٹھیینگ بوتگ، اے ٹھینتگیں پالیسی ءِ تہ ءَ ھمے پیسلہ کنگ بوتگ کہ ھما ورنا بلوچ آجؤئی جھد ءَ گوں بندوک انت ءُ یاگی انت آھانی کھول ءِ مردم بزاں برات، پت، ناکوزتک، تروزتک، سیاد ءُ وارس تچک ءَ ٹارگت کنگ ءُ کشگ بنت۔ اے میٹینگ ءِ تہ ءَ اے پیسلہ ھم کنگ بوتگ کہ ھما مردم پہ بلوچ راج ءَ توار چست کنن اَت یاکہ راجی جنز ءِ دوزواہ انت،  زانومند انت یاکہ آھانی تہ ءَ سیاسی سنچ ءُ بودشتے ھست آ اوں نشانگ کنگ ءُ کشگ بنت۔ ھمے میٹینگ ءِ تہ ءَ سیاسی دلار ءُ بلیدہ ءِ وت ءَ ھوامی نمائندہ گشوک پہ بلوچ ءِ چُکچینی ءَ دژمن ءَ پالیسی دیوک، پنجابی ءِ وزیر زھور بلیدی ھم اے دیوان ءَ ھوار بوتگ ءُ دژمن ءِ ھمے پالیسی بزاں بلوچ چُکچینی ءِ پسیلہ ءِ سر ءَ گوں دژمن ءَ ھم پت بوتگ ءُ وشی درشان کتگ۔ اے پیسلہ کنگ ءَ چہ پد نوکیں پالیسی ءِ سر ءَ دژمن ءَ کار کنگ بندات کتگ کہ دمگانی وتی داشتگیں ڈیت اسکواڑ ٹاسک داتگ انت۔ لشکر ءُ انٹلیجنس ءِ گْوشگ ءَ کشدہ ٹولی ءِ کارمنداں ھمے پالیسیانی سر ءَ گوں ترندی ءَ کار بندات کتگ، بلے تنیگت ءَ ایوک ءَ بلیدہ ءِ تہ ءَ کسانیں مدتے ءِ تہ ءَ کساس چل ءُ پنچ (45) ورنا بے گناہ شھید کتگ ءُ درچ انگت دیم ءَ روان اِنت۔