نبشتہ کار: سابرہ بلوچ
دگنیا ءِ کجام ھم راجے کہ دیمروی کنگ ءَ اِنت گڑا آئی ءِ پشت ءَ بلاھیں کرد آئی ءِ گلامی اِنت۔ گلامی یک ھما شے اِنت کہ راجاں دوبر زند گوازینگ ءَ پرما ایت، پمیشکا راج دیمروی کن اَنت۔ اگاں ما چائینہ، امریکہ، انڈیا ءُ دومی سیمی ملکانی درور ءَ زورت کن اِیں، نوں جست ایش اِنت کہ چتور گلامی راجاں دوبر زند گوازینگ ءَ پرما ایت؟
گڑا پسو ایش اِنت کہ وھدے زند گلام بیت گڑا زند سک وار بیت آ وت یک راجے ءِ پُسگاں وتی ھک ءِ پچ گرگ ءَ پرما ایت پمیشکا آشوب کا اَنت ءُ رِد (نظام) مٹ بہ اَنت۔
آشوب یک سک بلاھیں شے ءَ گوش اَنت۔ آشوب ناسرجمیں شے یے۔ کسے گْوش ایت کہ رِد ءِ بدلی ءَ گوْش اَنت۔ کسے گوش ایت کہ سرکار ءِ بدلی ءَ گْوش اَنت۔
بلے من گوْش آں آشوب وتی زند ءَ دوبر گرگ ءَ گْوش اَنت۔ آشوب وتی زمین ءَ چہ بدواھاں پچ گرگ ءَ گْوش اَنت۔
آشوب ھمینچو بلاھیں شے۔ آشوب ءِ آروک دو ھمینچو زور آور ءُ توانا بہ بنت۔ آشوبی جھد کار ءِ واستا لھتیں انچییں شے اَنت کہ پہ آشوب ءَ الم اَنت۔ چہ دروستان پیش کمیٹمینٹ اِنت۔ آشوبی جھد کار وتی لیکہ ءُ سسا ءِ سر ءَ مھکم بہ بنت ءُ وتی لیکہ ءِ ھاتر ءَ ھرچ وڑیں کربانی ءِ دیگ ءَ چک ءُ پد مہ بیت۔ وتی کاراں زمہ واری ءِ سر ءَ پیلو بہ کن اَنت۔ دیگہ کسے آئی ءَ زمہ واری ءَ مہ گْوش ایت۔ ھمینچو مھکم بیت کہ دژمن ءِ دیم ءَ اوشتگ ءُ گوں دژمن ءِ چماں چم دیگ ءَ چک ءُ پد مہ بیت۔ آشوبی جھد کار ھمینچو پُر امیت بہ بنت کہ تاوان ءُ برزی جھلی ءَ آشوب ءِ ھلاس بوگ سرپد مہ بیت۔
آشوبی جھد کار کجام ھم وھد ءُ جاوراں ترس ءِ آماچ مہ بیت۔ آشوبی جھد کار گوں وتی جنز ءُ گل ءَ نیک بہ بیت ءُ نگیگیں جاوراں وھدے دژمن ءِ دیم ءَ اوشت اِیت گڑا سکہ باز بے ترس بہ بیت ءُ چہ وتی کرد ءُ امل ءَ دژمن ءِ دل ءَ ترس ءِ بہ دنت۔
پہ آشوبی جھد کار ءَ دومی ھژدری شے ڈسیپلین اِنت۔ ڈسیپلین آشوبی جنزانی تہ ءَ الم اِنت۔ ابید ءِ ڈسیپلین آشوبی جھد ھلاسی اِنت ءُ نیم ءَ روت اَنت۔ اگاں دژمن ءِ سپاہی سرد ءُ گرم نہ چار ایت ءُ پہ زرّ ءِ ھاتر ءَ ڈسیپلین ءِ پابند بوت کنت گڑا باید اِنت یک آشوبی جھد کارے پہ وتی پتّی میراس ءُ مات ءِ سرڈگار ءِ ھاتر ءَ ڈسیپلین ءِ پابند بہ بیت۔ ھرچ وڑیں جاوراں پیسلہ زورگ ءِ وھد ءَ جنز ءُ گل ءِ پائدگ ءَ بچار ایت ءُ بہ دنت۔ وتی جند ءِ وشیانی ھاتر ءَ پیسلہ مہ دنت ءُ گل کہ ھرچ جاہ ءَ ترا لوٹ ایت تو برو ابید ءِ نا کنگ انت۔
پہ آشوبی جھد کاراں ھمت ھم یک بلاھیں شے یے۔ آشوبی جھد کار زانتکار، باسما ءُ باز اِلم ءُ امل کنوکے بہ بنت۔ آشوبی جھد کار ءِ تہ ءَ نگد کنگ ءِ جرت بہ بنت۔ جُست کنگ ءِ جرت بہ بیت ءُ پسّو دیگ ءِ جرت ھم بہ بیت۔ نگد تئی زاتی چیزانی سر ءَ نا بلکیں گل ءِ کار ءُ پروگرامانی سر ءَ بہ بیت۔ آشوبی جھد کار زاتی نپّ ءُ سیتانی ھاتر ءَ ھچ وڑیں کار مہ کن ھرچ کارے پہ گل ءُ جنز ءِ ھکّ ءَ بہ کن۔
آشوبی جھد کار ءِ کرّ ءَ دیر چاری ھم بہ بیت۔ کہ آشوبی جھد کار اے بہ زانت ئِے کہ دہ سال ءَ پد جنز چتور بیت۔ آشوبی جھد کار اے گپ ءِ کنگ ءَ باید لج بہ کنت کہ وھدے کسے آشوبی جھد کار ءَ جست بگر ایت کہ مروچی اگاں جنز اے رنگ ءَ اِنت گڑا دہ سال ءَ پد چو بیت آشوبی جھد کار ءِ پسو ایش مہ بیت کہ دہ سال رند ما زان ایں چو بیت۔ آشوبی جھد کار وتی کسان ءُ مزنیں پروگرامانی سان ءَ بہ زانت ءُ بہ زانت کہ آئی ءِ یک پیسلہ ءِ چینچو شر ءُ ھراب بوت کن۔
آشوبی جھد کار ھچ وڑا وتی تھا نرگزیت مہ یار ایت پرچا کہ آشوبی جھد کار ءِ سر ءَ الم اِنت کہ آ وتی سرجمیں جند ءَ ھلاس بہ کنت پہ وت ءَ مستریں لیکہ بزانکہ آشوب ءِ واستا اَنت۔ نرگزیت آشوب ءِ تھا نزوری کاریت ءُ آشوب ءَ ھلاسی ءِ نیمگ ءَ بارت پمیشکا آشوبی جھد کار نرگزیت ءِ آماچ مہ بیت۔ آشوبی جھد کار وت ءَ ھچ بر وتی دومی سنگت ءَ چہ برز مہ لیک ایت ءُ وتی جند ءِ ھاتر ءَ تنظیم ءُ آشوب ءَ تاوان مہ دے اَنت۔
آشوب یک بلاھیں شے اِنت۔ یک آشوبی سوت ءِ گوْش دارگ ءَ چہ کس آشوبی جوڑ نہ بیت بلکیں آشوب ءِ ھاتر ءَ وتی جند ءَ بگر زند ءُ زند ءِ ھمک وشی ندر کنگ ءَ اِنت۔ آشوب ساہ ھم لوٹ ایت زند ھم لوٹ ایت ءُ کربانی ھم لوٹ ایت۔ کربانی اے نہ اِنت کہ ساہ ءَ بہ دے بس بلکیں کربانی ایش اِنت کہ زند ءِ ھمک وشیاں بگر دانکہ ساہ دروستاں ندر کن۔ آشوب یکے یے سر ءَ نہ اِنت بلکیں سرجمیں راج ءِ سر ءَ زمہ واری ءُ المی اِنت پرچا درست گلام اَنت اے جتائیں گپے کہ کسے گلامی ءَ سرپد اِنت ءُ کسے نہ اِنت۔ آشوب یک وابے نہ اِنت بلکیں یک زندگ ءُ دائم زندگیں شے یے کہ راجانی پسگ ھمے شے ءَ پہ ساہ ندر کنگ ءَ اَنت۔
